अत्याचार करणाऱ्यास दहा वर्षे शिक्षा

म. टा. प्रतिनिधी, जळगाव

जामनेरात अल्पवयीन मुलासोबत एका नराधमाने अनैसर्गिक कृत्य केल्याची संतापजनक घटना घडली होती. या गुन्ह्यात त्या नराधमास न्यायालयाने दोषी धरत दहा वर्ष सक्तमजुरीची शिक्षा सुनावली आहे.

जामनेर तालुक्यातील देऊळगाव गुजरी येथील तीनवर्षीय बालकाला गावातीलच विनोद समाधान गणगे (वय २७) याने सतीमाता मंदिराजवळ नेऊन त्यासोबत अनैसर्गिक कृत्य केले होते. हा प्रकार गावात खेळणाऱ्या मुलांच्या लक्षात आल्याने आरोडाओरड झाली. पीडित मुलाची त्याच्याकडून सुटका करून गावकऱ्यांनी त्याला त्याला चोपही दिला होता. ही घटना दि. २१ फेब्रुवारी २०१६ रोजी घडली होती. याप्रकरणी पहूर पोलिसांत गुन्हा दाखल करण्यात आला.

याबाबतच्या खटल्याचे कामकाज बुधवारी (दि. १७) न्या. ज्योती दरेकर यांच्या कोर्टासमोर झाले. सरकारपक्षातर्फे अॅड. शिला गोडंबे यांनी तर संशयितातर्फे अॅड. विजय दर्जी यांनी काम पाहिले. खटल्यात पीडित मुलाची आई, भाऊ, खेळणाऱ्या मुलांपैकी एक, वैद्यकीय अधिकारी, तपासाधिकारी अशा एकूण ९ जणांच्या साक्षी न्यायालयाने ग्राह्य धरल्या. विनोद गणगेला कलम ३७७ खाली दोषी धरत १० वर्ष सक्तमजुरी, १० हजार दंड, कलम ५०६ प्रमाणे ३ वर्ष सक्तमजुरी, १ हजार रुपये दंड, बाल लैंगिक अत्याचार कायद्यातील कलम ४ खाली १० वर्ष सक्तमजुरी ५ हजार रुपये दंड, कलम ६ खाली १० वर्ष सक्तमजुरी, १० हजार दंड अशी शिक्षा न्यायालयाने सुनावली.