पोलिसांचा धाक संपला!

घरफोड्यांचे सत्र थांबेना; पुन्हा दोन घरे फोडली

म. टा. प्रतिनिधी जळगाव

जळगाव शहरात गेल्या महिनाभरापासून सुरू असलेले चोऱ्या व घरफोड्याचे सत्र थांबायचे नाव घेत नाही. गेल्या दोन दिवसांच्या चोरीच्या घटनांपाठोपाठ सोमवारीदेखील घरफोडीच्या दोन घटना समोर आल्या आहेत. यामुळे पोलिसांचा उरला सुरलेला धाक संपल्याची प्रचिती जळगावकरांना येत आहे.

शिवाजीनगर परिसरातील इंद्रप्रस्थ नगरात मनोज पुंडलिक तिळवणे यांचे घर आहे. बांभोरी येथील खासगी कंपनीत ऑपरेटर म्हणून ते नोकरीला आहेत. १७ ऑगस्ट रोजी सर्व कुटुंबीय रक्षाबंधनानिमित्ताने बऱ्हाणपूर येथे गेले होते. सोमवारी (दि. १९) सकाळी ९.३० वाजेच्या सुमारास गावाहून परतले असता त्यांना घराच्या मेन लोखंडी गेटचे कुलूप उघडल्यावर आतील दरवाजाचा कडी कोयंडा कापलेला दिसला. घरात पाहणी केली असता कपाटातील तसेच पलंगातील सामान अस्ताव्यस्त फेकलेला होता. चोरट्यांनी गेट वरून उडी मारून प्रवेश केला. चोरट्यांनी घरातून अडीच तोळे सोने व ४० हजार रुपये रोख असा सुमारे दीड लाखांचा ऐवज लांबविला. मनोज यांनी नवीन घर घेण्यासाठी त्यांनी हे पैसे जमविले होते.

प्रजापतनगरात घरफोडी
ममुराबाद रस्त्यावर असलेल्या प्रजापतनगरातील सुनंदिनी पार्कमध्ये राहणारे धर्मेश भोजराज पांडव हे ऑटो आयकॉनमध्ये व्यवस्थापक म्हणून कामाला आहेत. पांडव हे पत्नी कोमल, मुलगा हर्षल व मुलगी हेमा यांच्यासह राहतात. पांडव यांचे आई-वडील यावल तालुक्यातील म्हैसवाडी गावी राहतात. दि.१६ रोजी रात्री त्यांच्या आई प्रभावती यांचे निधन झाल्याने शनिवारी सकाळी पांडव परिवारासह तेथे गेले होते. याचवेळी चोरट्यांनी रात्री धर्मेश यांच्या घराच्या कंपाऊडमध्ये प्रवेश करीत खिडकीवर चढत बाहेरील लाईट फोडला. त्यानंतर मुख्य दरवाज्याचा कडी कोयंडा कापत आत प्रवेश केला. चोरट्यांनी घरातील लोखंडी, लाकडी कपाट फोडून एक हजार रुपये चोरले. सोमवारी सकाळी १० वाजता पांडव यांच्याकडे गॅस हंडी पोहचविण्यासाठी एजन्सीचा कर्मचारी आला होता. त्यावेळी समोर राहणाऱ्या एका महिलेने पांडव गावी गेल्याचे सांगितले. परंतु, गॅस एजन्सीच्या कर्मचाऱ्याने घराचा दरवाजा उघडा असल्याचे निर्दशनास आणून दिले. त्यावेळी घरात जावून पाहिले असता चोरी झाल्याचे लक्षात आले.