महादेव रस्त्यावरील अतिक्रमण जमीनदोस्त

म. टा. प्रतिनिधी, जळगाव

शहरातील मेहरूण परिसरात असलेल्या शामा कॉम्प्लेक्स ते महादेव मंदिर रस्त्यावर महापालिकेने सोमवारी (दि. २४) धडक मोहीम राबवून सर्व अतिक्रमणे काढली. यापूर्वीही या रस्त्यावरील अतिक्रमणे काढण्यात आली होती. मात्र, जैसे थे स्थिती झाल्याने सोमवारी, पुन्हा कारवाई करण्यात आली.

तांबापुरामधील अत्यंत वर्दळीचा असलेला शामा कॉम्प्लेक्स ते महादेव मंदिर मेहरूण हा रस्ता गेल्यावर्षी मोकळा करण्यात आला. तब्बल बारापेक्षा अधिक वर्षांनंतर या रस्त्याने मोकळा श्वास घेतला. यात २०० पेक्षा पक्की अतिक्रमणे काढण्यात आली. यात गटारींवरील ओटेदेखील तोडण्यात आले. यानंतर हा रस्ता रुंद करून याठिकाणी कायमस्वरूपी उपाययोजना करण्यात आल्या नाहीत. त्यामुळे या रस्त्यावर पुन्हा फेरीवाले व रहीवाशांच्या टपऱ्या लागल्या होत्या. शुक्रवारी (दि.२८) अक्षय तृतियेला मेहरूण महादेव मंदिराजवळून भवानी मातेच्या बारागाड्या ओढण्याचा कार्यक्रम होणार आहे. यासाठी महापालिकेने या रस्त्यावरील अतिक्रमण काढण्यासाठी ही मोहीम हातात घेतली. या रस्त्यावरील टपऱ्या, हातगाड्या व शेड अतिक्रमण विभागाच्या पथकाने काढल्या.