कर्मचारी उपदानासाठी आलेले पथक माघारी

म. टा. प्रतिनिधी, जळगाव

कामगार कोर्टाने महापालिकेच्या मृत कर्मचाऱ्याची उपदानाची रक्कम देण्याचे आदेश दिल्यानंतरही पैसे दिले नाही. यामुळे मंडळ अधिकारी यांच्यासह पथक मनपा आयुक्तांच्या जंगम मालमत्ता जप्तीचे आदेश घेऊन आले होते. मात्र, रक्कम लवकरच देण्याचे आश्वासन दिल्यानंतर पथक माघारी गेले व महापालिकेची नामुष्की टळली.

महापालिकेचे बांधकाम विभागातील कर्मचारी निवृत्ती बाबुलाल मोरे यांचा तीन वर्षांपूर्वी मृत्यू झाला. त्यांच्या पत्नीला पालिकेकडून नियमाप्रमाणे एक महिन्यात त्यांच्या उपदानाची रक्कम १ लाख २९ हजार ९४२ रुपये मिळणे अपेक्षित होते. मात्र, पालिका प्रशासनाने रक्कम न दिल्याने मुक्ताबाई निवृत्ती मोरे यांनी कामगार कोर्टात दावा दाखल केला.

त्यावर कामगार कोर्टाने महापालिकेला उपदानाची रक्कम देण्याचे आदेश देऊन ३ मे २०१३ पासून त्यावर १० टक्के व्याज देण्याचेही आदेश दिले. या आदेशानंतरदेखील रक्कम न दिल्याने जिल्हाधिकाऱ्यांना वसुलीच्या सूचना केल्या. त्यानुसार तहसीलदार यांनी उपदानाच्या रक्कमेएवढी महपालिका आयुक्तांची जंगम मालमत्ता अटकावून ठेवण्याचे (जप्ती) आदेश दिले. याबाबत गुरुवारी (दि. १८) वसुली अधिकारी मिलींद बुवा, तलाठी फिरोज शेख व अॅड.गजानन जाधव आयुक्तांच्या दालनात आले होते. त्यानतंर महापालिका प्रशासनाने रक्कम देण्यासाठी मुदत मागून मुदतीत रक्कम देण्याचे आश्वासन दिले. त्यामुळे जप्तीची प्रक्रिया टळली.