‘आगामी निवडणुका संघटित होऊन जिंकाव्या’

म. टा. प्रतिनिधी, जळगाव

आगामी महानगरपालिका, लोकसभा, विधानसभा निवडणुका पदाधिकारी व कार्यकर्त्यांनी संघटित राहून निवडून आणाव्यात, अशा सूचना राष्ट्रवादीचे अध्यक्ष शरद पवार यांनी सोमवारी (दि. २९) पदाधिकारी यांना दिल्या.

अजिंठा विश्रामगृहात आयोजित पदाधिकाऱ्यांच्या बैठकीत शरद पवार बोलत होते. या वेळी जिल्हा प्रभारी आमदार दिलीप वळसे पाटील, माजी खासदार ईश्वरलाल जैन, माजी खासदार वसंत मोरे, जिल्हाध्यक्ष आमदार डॉ. सतीश पाटील, माजी मंत्री गुलाबराव देवकर उपस्थित होते.

गटबाजीच्या तक्रारी

जिल्ह्यातील प्रमुख नेते एकत्र असल्यास येत्या विधानसभा निवडणुकीत ५-७ आमदार निवडून येतील, असे दिलीप वळसे पाटील यांनी सांगितले. पक्षात गटातटाचे वातावरण आहे. आगामी निवडणुकांसाठी पवार यांनी एकच आदेश देवून येत्या निवडणुकांसाठी जिल्ह्यासाठी दोन दिवस द्यावे, अशी मागणी विलास पाटील यांनी केली. यावेळी काही पदाधिकाऱ्यांनी प्रमुख नेते एकत्रित येत नसल्याची खंत पवार यांच्या समोर व्यक्त केली. निवडणुकीच्या वेळी जिल्ह्यातील प्रमुख नेत्यांचे सोयीचे राजकारण करत असल्याचे राजेश वानखेडे यांनी सांगितले.