भाजी विक्रेत्याकडून तरुणाला मारहाण

म. टा. प्रतिनिधी, जळगाव

भाजीपाला विक्रेत्याच्या गाडीसमोर महिलेने पापडाचे दुकान लावल्याने विक्रेत्याने महिलेशी वाद घालत शिवीगाळ केली. यानंतर विक्रेत्यास समजवण्यास गेलेल्या महिलेच्या मुलालादेखील विक्रेत्याने शिवीगाळ करीत लोखंडी रॉडने युवकाला मारहाण केली. यात तरुणाच्या डोक्यास दुखापत झाली आहे. ही घटना सव्वा अकरा वाजता शाहू नगरात घडली.

शाहू नगरातील मुमताजबी शेख रहिम यांनी नुकतेच दोन दिवसांपासून पापड विक्रीचा छोटासा व्यवसाय सुरू केला असून, बुधवारी (दि. १७) देखील शाहू नगरात त्या छोटेसे दुकान लावून पापड विक्री करीत होत्या. त्यादरम्यान, भाजीपाला विक्रेता सादीक शेख हा मुमताजबी यांच्याकडे येऊन माझ्या गाडीसमोर दुकान का लावतात, असे जाब विचारून वाद घालत मुमताजबी यांना शिवीगाळ करू लागला. हा प्रकार पाहिल्यानंतर मुमताजबी यांच्या मुलगी शाहीनने बांधकाम साईडवर काम करीत असलेल्या भाऊ अरबाजकडे येत आईला भाजीपाला विक्रेता शिवीगाळ करीत असल्याचे सांगितले. सकाळी ११ वाजेच्या सुमारास अरबाज हा सादीक शेखकडे आल्यानंतर समजवण्याचा प्रयत्न करीत होता. मात्र, भाजीपाला विक्रेत्याने त्याच्याशीही वाद घालून शिवीगाळ करण्यास सुरुवात केली. हेच नव्हे तर लोखंडी रॉडने अरबाजला मारहाण करून त्याचे डोके फोडले. त्यानंतर अरबाजला कुटुंबीयांनी तातडीने रुग्णालयात उपचारार्थ नेले. प्राथमिक उपचार झाल्यानंतर मुमताजबी व मुलगा अरबाज यांनी पोलिस स्टेशन गाठत भाजीपाला विक्रेत्याविरुद्ध तक्रार दाखल केली.

उपचारादरम्यान मृत्यू

येथील व. वा. वाचनालय परिसरातील रहिवासी चंद्रशेखर प्रभाकर जाट (वय ४५) यांची मंगळवारी मध्यरात्री प्रकृती खालावल्याने त्यांना जिल्हा सामान्य रुग्णालयात त्यांचे शालक उज्ज्वल पद्माकर बल्लाळ यांनी उपचारार्थ दाखल केले होते. परंतु, उपचार घेत असताना मध्यरात्री १ वाजेच्या सुमारास त्यांचा मृत्यू झाला.

अनोळखी वृद्धाचा मृत्यू

शिवाजीनगर हुडको परिसरातील शेतात एक अनोळखी वृद्ध जखमी अवस्थेत मिळून आल्यानंतर रहिवाशांनी त्यास जिल्हा सामान्य रुग्णालयात बुधवारी सकाळी दाखल केले. उपचार घेत असतांना त्यांचा मृत्यू झाला.