वीजतार पडून तीन खासगी बसेस खाक

महामार्गावरील घटना; वाहतूक खोळंबली

म. टा. प्रतिनिधी, जळगाव

शहरातील नशिराबाद शिवारातील दूरदर्शन टॉवरच्यासमोर उभ्या असलेल्या तीन खासगी बसेस विजेच्या तारेने जळून खाक झाल्याची घटना रविवारी (दि. १) दुपारी घडली. या घटनेनंतर एकापाठोपाठ तिनही बसेस जळाल्या असून, ही घटना दुपारी एक वाजेच्या दरम्यान झाली.

जळगाव येथील विलास एन. देशपांडे यांच्या मालकीचे नशिराबाद शिवारात महामार्गावर दूरदर्शन टॉवरसमोर प्रसन्न ट्रॅव्हर्ल्स म्हणून दुकान आहे. या कंपनीच्या दोन बसेस (एमएच. ४३ एच. २०१ व एमएच. ०४ जी. ५४४६) या गॅरेजवर बाहेर लावण्यात आलेल्या होत्या. जैन इरिगेशन कंपनीचीही एक बस दुरुस्तीसाठी आली होती. या तिन्ही बसेस शेजारीच होत्या. रविवारी दुपारी एक वाजता बसेसच्या वरून गेलेल्या वीज वाहिनीची तार अचानक तुटून ती जैन कंपनीच्या बसवर पडली. क्षणातच धूर निघून या बसने पेट घेतला. पहिल्या बसने पेट घेतल्यानंतर या आगीत शेजारी उभ्या असलेल्या दोन्ही बसेसला आपल्या आवाक्यात घेतल्याने तिन्ही खासगी बस पेटल्या. अचानक झालेल्या आगीने महामार्गावर बराच वेळ वाहतूक ठप्प झाली होती.

आग विझविण्यासाठी पाच बंबांची मदत
या घटनेची माहिती समजल्याने विलास देशपांडे व त्यांचा मुलगा अभिजित यांनी घटनास्थळी धाव घेतली. त्यांनी तातडीने पालिकेच्या अग्निशमन दलाशी संपर्क साधत घटनेबाबत सांगितले. त्यानंतर अर्धा तासातच दोन बंब दाखल होऊन आग विझवण्यासा सुरुवात झाली. त्यानंतर जैन कंपनीचाही बंब दाखल झाला. वेळेवर बंब पोहचले असते तर कदाचित बसेसचे इतके नुकसान झाले नसते, असे देशपांडे यांनी सांगितले. या आगीत जवळपास २५ लाख रुपयांचे नुकसान झाले असून, या दोन्ही बसेस विना वापराच्या असल्याने त्या लावण्यात आल्या होत्या.