विनयभंग करणाऱ्यास तीन वर्षांची शिक्षा

म. टा. प्रतिनिधी, जळगाव

तालुक्यातील शिरसोली प्र. न. येथील तेरावर्षीय मुलीचा तरुणाने विनयभंग केला होता. याबाबत एमआयडीसी पोलिस ठाण्यात तरुणाविरुद्ध गुन्हा दाखल करण्यात आला होता. हा खटला न्यायाधीश ज्योती दरेकर यांच्या न्यायालयात सुरू होता. त्यात मंगळवारी (दि. १८) न्या. दरेकर यांनी विनयभंग करणार्‍या तरुणाला ३ वर्षांची शिक्षा व ५ हजार ५०० रुपयांचा दंड ठोठावला आहे.

शिरसोली प्र. न. येथे तेरावर्षीय अल्पवयीन मुलीचा रवींद्र माधवराव सांबळे (रा. शिरसोली) या तरुणाने विनयभंग केला होता. यानंतर पीडित मुलींच्या फिर्यादीवरून एमआयडीसी पोलिस ठाण्यात तरुणाविरुद्ध गुन्हा दाखल करण्यात आला होता. दोषारोपपत्र दाखल झाल्यानंतर खटला न्यायाधीश ज्योती दरेकर याच्या न्यायालयात चालला. दरम्यान, याप्रकरणी सरकार पक्षातर्फे सात साक्षीदार तपासण्यात आले. त्यात पीडित मुलगी, तिचे आई-वडील, पंच, साक्षीदार, तपास अधिकारी तसेच शाळेचे मुख्याध्यापक यांच्या साक्षी महत्त्वपूर्ण ठरल्या.

कुटुंबाचे उपोषण

जळगाव : सलमान बाबु पटेल याचा मृतदेह मेहरूण तलावात आढळून आला होता. याबाबत त्याच्या वडीलांनी घातपाताचा संशय व्यक्त करून संशयितांची नावे पोलिसांना दिली. परंतु, अद्याप संशयितांवर कारवाई न झाल्याने मृत सलमानचे कुटुंब सोमवारपासून जिल्हाधिकारी कार्यालयासमोर उपोषणास बसले आहे. सलमान बाबु पटेल (रा. तांबापुरा) याचा दि. २१ मे रोजी मृत्यू झाल्याची घटना घडली होती. दुसर्‍या दिवशी याबद्दल एमआयडीसी पोलिस ठाण्यात तक्रार देण्यात आली होती. तक्रार केल्याच्या दुसऱ्यादिवशी मेहरूण तलावात सलमानचा मृतदेह तरंगताना दिसून आला. सलमान हा पट्टीचा पोहणार होता. त्यामुळे पाण्यात बुडुन त्याचा मृत्यू होणे अशक्य आहे. त्यामुळे त्याचा घातपात करून खून करण्यात आला आहे. मारेकऱ्यांवर कारवाई झाली नसल्याने बाबु ईसा पटेल, अरमान बाबु पटेल, हाजराबी बाबु पटेल व यास्मिन बाबु पटेल यांनी उपोषण सुरू केले आहे.