मुक्ताईनगर परिसरात वाघ मृतावस्थेत

पाच महिन्यांतीन दुसरी घटना

म. टा. वृत्तसेवा, रावेर

मुक्ताईनगर तालुक्यातील थेरोळा गावालगत पूर्णा नदीपात्रात पट्टेदार वाघ रविवारी (दि. १२) सकाळी मृतावस्थेत आढळून आला आहे. वढोदा वनपरिक्षेत्रात यापूर्वी तीन पट्टेदार वाघ मृत अवस्थेत आढळून आले आहेत. आता या वाघांच्या मृत्यूमागचे नेमके कारण काय याचा शोध घेण्याची मागणी परिसरातील नागरिकांनी केली आहे.

पावसाची प्रतीक्षा आणि पाण्यासाठीची वणवण हे तर यामागील कारण नाही ना, असाही कयास लावला जात आहे. जिल्ह्यात काही चाळीसगाव शिवारात बिबट्याने धुमाकूळ घातला होता. आता वाघांच्या संशयास्पद मृत्यूने चर्चोला उधाण आले आहे.

वढोदा वन परिक्षेत्रातील गेल्या पाच महिन्यांतील ही दुसरी घटना आहे. रविवारी (दि. १२) सकाळी अकरा वाजता उघडकीस आली. या घटनेत कुऱ्हा गावालगतच्या थेरोळा गावाच्या गावठाणापासून दोन किलोमीटर अंतरावर शेती शिवाराशेजारील पूर्णा नदीपात्रात पट्टेदार वाघ मृतावस्थेत आढळून आला. मिळालेल्या माहितीनुसार पूर्णा नदीकाठावर वाघाचा मृतदेह कुजलेल्या अवस्थेत आढळून आला असून, परिसरात दुर्गंधी पसरलेली आहे.

मृत्यू की घातपात?
वाघाचा मृत्यू पाण्यात बुडून झाला की घातपाताने याबाबत साशंकता व्यक्त केली जात आहे. दरम्यान, वढोदा वन परिक्षेत्राधिकारी अमोल चव्हाण व सहकारी कर्मचारी घटनास्थळी दाखल झाले असून, घटनेची माहिती तत्काळ वरिष्ठांना कळविण्यात आली आहे. तूर्त घटनास्थळ निर्मनुष्य करण्यात आले असून, जिल्हास्तरावरून वरिष्ठ अधिकारी दाखल झाल्यानंतर मृत वाघाला पाण्याबाहेर काढण्यात येणार आहे, अशी माहिती वन विभागाकडून देण्यात आली आहे. यामागे घातपात असू शकतो का, असाही तपास सुरू करण्यात आला आहे.