थकबाकीचे उद्दिष्ट साध्य करा, अन्यथा कारवाई

कार्यकारी संचालक श्रीकांत जलतारे यांचा इशारा

म. टा. प्रतिनिधी, जळगाव

जळगाव परिमंडळाची वीजबिलाची थकबाकी वाढली असून, ही चिंतनीय बाब आहे. तेव्हा थकबाकीदार ग्राहकांविरुद्ध कठोर भूमिका घेऊन थकबाकी वसुलीसाठी वीजपुरवठा खंडित करा आणि थकबाकी वसुलीचे उद्दिष्ट साध्य करा, असे आदेश देयक व महसूलचे कार्यकारी संचालक श्रीकांत जलतारे यांनी महावितरणच्या अभियंत्यांना दिले आहेत. हे थकबाकी वसुलीचे उद्दिष्ट साध्य न करणाऱ्या अभियंता व कर्मचाऱ्यांवर कारवाई करण्यात येईल, असा इशाराही जलतारे यांनी दिला आहे.

जळगाव परिमंडळाची नुकतीच आढावा बैठक घेण्यात आली त्यामध्ये जलतारे बोलत होते. त्यांनी ‘महावितरण डॅशबोर्ड’ च्या आधारे अद्ययावत पद्धतीने ही बैठक घेतली. या बैठकीत प्रामुख्याने थकबाकी वसूली, अकृषीक वीजवितरण व महसूल, घरगुती, वाणिज्यिक व औद्योगिक वर्गवारीतील एक लाखांपेक्षा अधिक थकबाकीदार ग्राहक या विषयावर आढावा घेतला. या वेळी जळगाव परिमंडळाचे मुख्य अभियंता ब्रिजपालसिंह जनवीर, अधीक्षक अभियंता दत्तात्रय बनसोडे यांच्यासह सर्व विभागाचे कार्यकारी अभियंते, कर्मचारी उपस्थित होते.

दोन दिवसांत अहवाल द्या
परिमंडलात अकृषीक ग्राहकांची थकबाकी ७०८ कोटी असून, थकबाकीसह चालू वीज देयके १०० टक्के वसूल करा, असे त्यांनी सांगितले. त्यांनी प्रत्येकाला ठराविक उद्दिष्ट देऊन ते साध्य करण्याच्या सूचना दिल्या. जळगाव परिमंडळात घरगुती, वाणिज्यिक व औद्योगिक या वर्गवारीतील एक लाखांपेक्षा अधिक थकबाकी असलेले ४३८ ग्राहक आहेत. त्यांच्याकडे जवळपास १५ कोटी थकबाकी असून, पुढील दोन दिवसांत याबाबत ठोस कारवाई करून अहवाल द्यावा, अन्यथा प्रशासकीय कारवाई केली जाईल, असेही जलतारे यांनी सांगितले.

ग्राहकांनी महावितरणला सहकार्य करावे
या बैठकीत जलतारे यांनी अकृषीक वीजवितरणाचे उद्दिष्ट साध्यतेबाबत अभियंत्यांना विचारणा केली. अकृषीक वीजवितरणाचे उद्दिष्ट निश्चितीची प्रक्रियेबाबत सर्व अभियंत्यांना सविस्तरपणे मार्गदर्शन केले. त्यामुळे बिलिंगवर नियंत्रण मिळविणे शक्य होणार आहे. ऑनलाइन देयके संकलन प्रणालीचा महावितरणच्या अधिकृत वीजबिल भरणा केंद्रांनी स्वीकार केला आहे. ही प्रणाली ग्राहकांच्या फायद्याची असून, ग्राहकांनी महावितरणला सहकार्य करावे, असेही ते म्हणाले.