गाळ्यांबाबत सकारात्मक तोडगा काढा

गाळेधारक कोअर कमिटीचे आमदार भोळेंना साकडे

म. टा. प्रतिनिधी, जळगाव

महापालिकेच्या मुदत संपलेल्या १४ व्यापारी संकुलांतील गाळेधारकांनी सोमवारी महापालिकेत आमदार सुरेश भोळे यांची भेट घेतली. या वेळी कोअर कमिटीचे अध्यक्ष डॉ. शांताराम सोनवणे यांनी मुदत संपलेल्या गाळ्याबाबत सकारात्मक तोडगा काढावा, असे साकडे आमदार भोळे यांना घातले.

गाळेधारकांना २०१२ पर्यंत भरण्यात येणाऱ्या वार्षिक ६ हजार रुपये भाडे होते. त्यावर १० ते १५ टक्के वाढ करून किंवा तीनपट वाढ करून २०१८ पर्यंत भाडे आकारणी करावी. ही सर्व रक्कम भरू आणि गाळ्यांच्या चाव्या प्रशासनाच्या ताब्यात देऊ, अशी भूमिकादेखील डॉ. शांताराम सोनवणे यांनी पत्रकारांशी बोलताना मांडली. मनपा मालकीच्या मुदत संपलेल्या १८ व्यापारी संकुलांपैकी १४ व्यापारी संकुलांतील काही गाळेधारकांनी आमदार भोळे यांची भेट घेऊन तोडगा काढण्यासंदर्भात चर्चा केली. डॉ. शांताराम सोनवणे, तेजस देपुरा, राजस कोतवाल, युवराज वाघ, संजय पाटील, राजेश पिंगळे, राजु समदानी, भूषण देपुरा, पंकज मोमया, नंदु सोनार, राजेश तलरेजा आदींसह उपमहापौर डॉ. अश्‍विन सोनवणे, भाजप गटनेते भगत बालाणी, कैलास सोनवणे उपस्थित होते. १४ संकुलांतील गाळेधारक न्यायालयात गेलेच नाही. ‘कॅम्पाकोला’ सारख्या अनधिकृत इमारतीचे बांधकाम तोडण्यासाठी न्यायालय स्थगिती देवू शकते. तिथल्या लोकांना न्याय मिळू शकतो, तर गाळेधारकांना का नाही, असा सवालही डॉ. शांताराम सोनवणे यांनी उपस्थित केला. महापालिकेचे आणि गाळेधारकांचेही नुकसान होणार नाही. यासाठी कायदेशीर बाबी विचारात घेण्यासाठी मुंबईला अधिकाऱ्यांशी चर्चा करणार आहे. मुल्यांकन कमी करता येईल का, याबाबतही विचार करणार असल्याचेही आमदार भोळे यांनी सांगितले.