ईव्हीएम विरोधात संघटनांची एकजूट

लोकशाही बचाव समितीचे आज धरणे

म. टा. प्रतिनिधी, जळगाव

लोकशाहीतील जनमताला घातक ठरत असलेल्या ईव्हीएम मशीन विरोधात लोकशाही बचाव संघर्ष समितीच्या बैठकीत मोठे जनआंदोलन उभारण्याचा निर्धार करण्यात आला. समितीच्या वतीने जिल्हाधिकारी कार्यालयासमोर आज (दि. १६) धरणे आंदोलन करण्याचा निर्णय घेण्यात आला.

भारतीय मतदान प्रक्रियेत ईव्हीएम मशीनमध्ये छेडछाड व फेरफार करून लोकशाही संपविण्याचे प्रयत्न सुरू झाल्याचा आरोप करीत त्याविरुद्ध जळगाव शहरात स्थापन लोकशाही बचाव संघर्ष समितीची बैठक नुकतीच अजिंठा विश्रामगृहात झाली. अध्यक्षस्थानी समितीचे मुख्य संयोजक मुकुंद सपकाळे हे होते.

बैठकीत लोकसंघर्ष मोर्चाच्या अध्यक्षा प्रतिभा शिंदे यांच्या प्रमुख उपस्थितीत ईव्हीएम विरुद्ध राज्यस्तरीय परिषद आयोजित करण्याबाबत निर्णय घेण्यात आला. समितीच्या वतीने जिल्हाधिकारी कार्यालयासमोर आज (दि. १६) धरणे आंदोलन करण्यात येणार आहे. प्रास्ताविक भारत ससाणे यांनी केले. या वेळी शिवराम पाटील, हरिश्चंद्र सोनवणे, प्रा. प्रितीलाल पवार, सचिन धांडे, पियुष पाटील, अश्पाक पिंजारी, फहिम पटेल, विश्वास बिऱ्हाडे, बाबूराव वाघ, अरविंद मानकरी आदींनी आपले मत मांडले.

देशात मॉब लिंचिंगच्या घटना वाढत आहेत, जातीय आणि धर्मांध विचारांना चालना दिली जात असून ईव्हीएम मशीनमध्ये फेरफार व छेडछाड करून निवडणुका जिंकून देशात अध्यक्षीय प्रणाली आणण्याचा प्रयत्न सुरू झाला आहे, असा सूर बैठकीत व्यक्त करण्यात आला. लोकशाही बचाव संघर्ष समितीच्या माध्यमातून महिलांना मोठ्या संख्येने आंदोलनात सहभागी करून घेणे, युवकांना संविधानाची माहिती करून देण्यासाठी शिबिरे आयोजित करणे याबाबत नियोजन करण्यासाठी आराखडा तयार करण्याचा निर्णयदेखील बैठकीत झाला.