मंगळ ग्रह मंदिरात चिनी मालाविरुद्ध प्रतिज्ञा

म. टा. प्रतिनिधी, जळगाव

शेवटचा श्रावणी मंगळवार, दहीहंडी आणि देशाचा स्वातंत्र्यदिन असा तिहेरी मुहूर्त साधत मंगळ ग्रह सेवा संस्थेने मंगळवारी (दि. १५) श्री मंगळ देव ग्रह मंदिरात भाविकांना चिनी मालावर बहिष्काराची प्रतिज्ञा देण्याचे अभियान सुरू केले. अशाप्रकारे देशाभिमान जागृत करीत चिनी मालावर बहिष्कार टाकण्यासाठी देशवासीयांना प्रवृत्त करणारे अभियान सुरू करणारे हे प्रथम व एकमेव देवस्थान ठरले आहे.

युद्धदेवता आणि भूमिपुत्र असलेल्या मंगळ ग्रह देवतेच्या दरबारात संस्थेने देशहिताचा विचार करून चिनी मालाविरुद्ध अभियान सुरू केले आहे. चिनी माल खरेदी करणार नाही व इतरांनाही बहिष्कारासाठी प्रवृत्त करू अशा आशयाची प्रतिज्ञा येथे येणाऱ्या भाविकांना दिली जाते. अभिषेक करण्यासाठी आणि दर्शनासाठी प्रचंड संख्येने आलेल्या भाविकांनी अशी शपथ आनंदाने घेत पालन करण्याचे उत्स्फुर्तपणे अभिवचन दिले. याप्रसंगी संस्थेचे अध्यक्ष डिगंबर महाले सर्वांना अभियानाचे महत्त्व सांगून शपथ देत होते. सायंकाळी मंदिरात जळगाव मनपाचे नगरसेवक कैलास सोनवणे, जळगाव जिल्हा गणेश महामंडळाचे अध्यक्ष सचिन नारळे, अमळनेर येथील सहाय्यक पोलिस निरीक्षक एकनाथ ढोबळे यांच्या हस्ते महाआरती करण्यात आली.