पंधराशेची लाच घेणाऱ्या अव्वल कारकुनास अटक

म. टा. प्रतिनिधी, जळगाव

दरमहा ५०० रुपये असा तीन महिन्याचा हप्ता म्हणून रेशन दुकानदाराकडून १५०० रुपयांच्या लाचेची मागणी करुन ती घेणाऱ्या भुसावळ पुरवठा विभागातील अव्वल कारकुनास लाचलुचपत विभागाच्या पथकाने सोमवारी (दि. १९) रंगेहाथ अटक केली.

भुसावळ येथील तक्रारदार यांचे स्वस्त धान्य दुकान आहे. त्या दुकानासाठी दरमहा ५०० रुपये हप्ता याप्रमाणे तीन महिन्यांसाठी तहसील कार्यालयातील पुरवठा विभागाचे अव्वल कारकून रवींद्र विनायक तारकस (वय ५७) यांनी १५०० रुपयांची लाच तक्रारदारास मागितली होती. तक्रारदारांनी याबाबत लाचलुचपत विभागाकडे तक्रार केली होती. त्यानुसार पथकाने सापळा रचून सोमवारी संशयित रवींद्र विनायक तारकस यांना लाच स्वीकारतांना अटक केली. याप्रकरणी पोलिसात गुन्हा दाखल करण्यात आला आहे.

रेशन अपहारात दोघांना कोठडी
रावेर : राज्यभर गाजत असलेल्या रेशन अपहारप्रकरणी तिनही संशयित आरोपींना पोलिसांनी रविवारी (दि. १८) मध्यरात्रीपूर्वी अटक केली. या तिघांना न्यायालयाने दोन दिवसांची पोलिस कोठडी सुनावली. १४ ऑगस्ट रोजी शहरात जिल्हा पुरवठा अधिकारी सुनील सूर्यवंशी यांनी धाड टाकत २८ लाखांचे रेशनिंग धान्यासह मुद्देमाल व ट्रक जप्त केला होता. या प्रकरणी पोलिसांनी रेशन दुकानदार विलास चौधरी आणि पंचायत समिती सदस्य योगेश पाटील, रेशन दुकानदार सुनील बाळकृष्ण नेवे (रा. चुंचाळे ता. यावल) या तिघही संशयितांना रविवारी मध्यरात्री अटक केली.