गाळ्यांच्या स्थगितीवर मंगळवारी सुनावणी

म. टा. प्रतिनिधी, जळगाव

महापालिकेच्या १८ मार्केटमधील मुदत संपलेल्या २१७५ गाळ्यांचे रेडीरेकनरनुसार पाचपट दंड आकारून भाडे घेणे. तसेच लिलावाद्वारे गाळे दीर्घ मुदतीने देण्याच्या महासभेच्या ४० क्रमांकाच्या ठरावाला सरकारने स्थगिती दिली आहे. यावर नगरविकास राज्यमंत्री रणजीत पाटील यांच्याकडे मंगळवारी (दि. २३) सुनावणी होणार आहे.

महापालिकेच्या मुदत संपलेल्या १८ मार्केटमधील गाळेधारकांकडे थकित असलेले भाडे व त्यावर पाचपट दंडाच्या नोटिसा ठराव क्रमांक ४० प्रमाणे किरकोळ वसुली विभागाने बजावल्या आहेत. तसेच या ठरावाप्रमाणे ज्या गाळ्यांच्या भाडे कराराची मुदत संपली असून, ते गाळे लिलाव पद्धतीने दीर्घ मुदतीने देण्याचादेखील निर्णय घेण्यात आला आहे. मात्र, या ठरावाविरुद्ध गाळेधारकांनी केलेल्या तक्रारीनंतर नगरविकास राज्यमंत्री रणजीत पाटील यांनी स्थगिती दिली होती.

गाळ्यांच्या प्रक्रियेप्रकरणी हायकोर्टात सुरू असलेल्या दाव्यात तत्कालीन आयुक्त संजय कापडणीस यांनी गाळेधारकांकडील मागील थकित भाडे रेडीरेकनरनुसार वसूल करून कलम ८१ अन्वये गाळे ताब्यात घेणार असल्याची प्रक्रिया १ वर्षात करण्याचे शपथपत्र कोर्टात दिले होते. त्यानुसार आयुक्त सोनवणे यांनी शासनाला पत्र देऊन स्थगितीवर निर्णय घेण्याची मागणी केली होती. तसेच राज्यमंत्री रणजित पाटील यांना प्रत्यक्ष भेटून माहिती दिली होती. यानुसार आता स्थगितीवर राज्यमंत्री पाटील यांच्याकडे मंगळवारी ही सुनावणी होणार आहे.