दोन मुलांचा बुडून मृत्यू

मेहरूण तलावात पोहण्यासाठी गेले असताना दुर्घटना

म. टा. प्रतिनिधी, जळगाव

मेहरूण तलावात पोहण्यास गेलेल्या दोन शाळकरी मुलांचा पाण्यात बुडून मृत्यू झाल्याची हृदयदावक घटना सोमवारी (दि. ३०) दुपारी साडेतीन वाजता घडली.

या घटनेची माहिती मिळताच त्यांना वाचविण्यासाठी पाण्यात उडी घेतलेल्या दोन जिगरबाज तरुणांचा प्रयत्न असफल ठरला. मोहम्मद दानिश यूसुफोद्दीन (वय १३) , मोहम्मद खालिद अनिसोद्दीन पिरजादे (वय १४, रा. पिरजादेवाडा मेहरूण) असे मृत मुलांचे नाव आहे.

जळगाव शहरतील मेहरूण भागातील पिरजादेवाड्यात राहणारे मोहम्मद दानिश यूसुफोद्दीन, मोहम्मद खालिक अनिसोद्दीन पिरजादे ही दोन्ही मुले महापालिकेच्या शाळेत शिकतात. शाळेस सुट्या असल्याने दोघेही सोमवारी, दुपारी घरी न सांगता मेहरूण तलावात पोहण्यासाठी गेली होती. उन्हामुळे मेहरूण तलाव गेल्या काही दिवसात आटला आहे. मात्र, ज्या भागात पाणी आहे. त्या भागात ही दोन्ही मुले पोहण्यासाठी गेली. पाण्यात उड्या घेतल्यानंतर पाण्यातील डोहामध्ये ती बुडायला लागली. प्रयत्न करूनदेखील पाण्यातून निघता येत नसल्याने त्यांनी आरडाओरड केली. याचवेळी या भागात म्हशी चारण्यासाठी आलेल्या व्यक्तीला ही मुले बुडत असल्याचे दिसली. त्यांनी त्यावेळी तलाव परिसरातील लोकांना तर काहींनी पिरजादे वाड्यात फोन करून माहीती दिली.

वाचविण्याचा प्रयत्न असफल
याचवेळी तलावाजवळून जाणाऱ्या कपिल महम्मद पिरजादे, जमिल नवीस अकीलोद्दीन पिरजादे यांनी मुलांना वाचविण्यासाठी क्षणात पाण्यात उड्या घेतल्या. त्यांनी दोन्ही मुलांपर्यंत पोहचून त्यांचा शोध घेऊन बाहेर काढले. तोपर्यंत पिरजादेवाड्यात माहिती मिळाल्याने तलावाजवळ रुग्णवाहिका पोहचली होती. त्यांना बाहेर काढताच रुग्णवाहिकेने सिव्हिल हॉस्पिटलमध्ये आणण्यात आले. दोघांची वैद्यकीय अधिकारी यांनी तपासणी केल्यानतंर त्यांना मृत घोषीत करण्यात आले.

सिव्हिल हॉस्पिटलमध्ये गर्दी
घटनेचे वृत्त कळताच सिव्हिल हॉस्पिटलमध्ये मोठी गर्दी झाली होती. मेहरूण परिसर, पिरजादे वाड्यातील नागरिक, मृतांचे कुटुंबीय व नातेवार्इकांनी हॉस्पिटलला धाव घेतली. कुटुंबीयांनी यावेळी आक्रोश केला होता. यातील मृत खालिद याचे आर्इ वडील चोपडा येथे भाचीचा मृत्यू झाल्याने गेले होते. त्यांना घटनेची माहिती मिळाल्यानंतर धक्का बसला. खालिद याच्या पश्चात दोन भाऊ आहेत. मृत दानिश याच्या पश्चात चार भाऊ, आर्इ, वडील असा परिवार आहे.