विवेकानंद मंडळातर्फे ‘फॉगिंग मशिन्स’

म. टा. प्रतिनिधी, जळगाव

सध्या जळगाव शहरासह जिल्ह्यात डेंग्यू, फॅल्सिपॅरम मलेरिया आणि डासाच्या रोगांचे थैमान सुरू आहे. या पार्श्वभूमीवर जळगावातील श्री स्वामी विवेकानंद बहुउद्देशीय मंडळाने दोन फॉगिंग मशिन जनसेवेत समर्पित केलेल्या आहेत. गरज पाहून भविष्यात आणखी तीन मशिन मागविण्याची तयारी मंडळाने ठेवली आहे.

मंडळाच्या कार्यकर्त्यांनी मंडळाचे अध्यक्ष तसेच माजी नगरसेवक कैलास सोनवणे यांच्या वाढदिवसाला या मशिनच्या लोकार्पण कार्यक्रम आयोजला होता. जळगावसह जिल्ह्यातल्या विविध हॉस्पिटल्समध्ये प्लेटलेट्स कमी झालेले रुग्ण दररोज मोठ्या संख्येने दाखल होत असताना वाढदिवसाला धुरळणी यंत्राची लोकार्पण औपचारिकता कितपत योग्य असे सोनवणे यांनीच कार्यकर्त्यांना समजावले. आधीच ही यंत्रे उपयोगात आणली गेली.

बुधवार (दि. २०) पासून शनीपेठ परिसरात धुरळणीला सुरुवात करण्यात आली. जळगावातील मध्यमवर्गीय रहिवाशी परिसर, शाळा, कॉलेजेस या परिसरांतून व झोपडपट्टी भागांतून अशी प्रतिबंधात्मक काळजी वाहणारी यंत्रणाच नसल्याने या भागांतून मंडळातर्फे स्वखर्चाने धुरळणी करण्यात येणार आहे. अर्थात या भागांसाठी डिझेलसह डास नाशकाचा खर्चही मंडळ उचलेल. शालेय, महाविद्यालयीन परिसरांतून धुरळणी करून घेण्यासाठी संबंधित शाळा, कॉलेजांच्या अनुक्रमे मुख्याध्यापक व प्राचार्यांनी तसेच शहरातील इतर भागातील नागरिकांनी ०२५७-२२३४४५५ या दूरध्वनी क्रमांकावर सकाळी १० ते सायंकाळी ६ या वेळेत संपर्क साधून आपापली मागणी नोंदवावी, असे आवाहन मंडळातर्फे

करण्यात आले आहे.