उद्धव ठाकरे यांची सभा पुढे ढकलली

म. टा. प्रतिनिधी, जळगाव

पाचोरा येथील माजी आमदार आर. ओ. पाटील यांची प्रकृती अस्वस्थ झाल्याने त्यांच्यावर उपचार सुरू आहेत. त्यामुळे पाचोरा येथे दि. १५ फेब्रुवारी रोजी होणारी शिवसेनेचे पक्षप्रमुख उद्धव ठाकरे यांची सभा पुढे ढकलण्यात आली असल्याची माहिती शिवसेनेचे आमदार किशोर पाटील यांनी शनिवारी (दि. ९) पत्रकार परिषदेत दिली.

लोकसभा निवडणुकीच्या पार्श्वभूमीवर शिवसेनेचे पक्षप्रमुख उद्धव ठाकरे यांची पहिली जाहीर सभा पाचोरा येथे दि. १५ फेब्रुवारी रोजी आयोजित करण्यात आली होती. विशेष म्हणजे, शिवसेनेने जळगाव लोकसभा मतदारसंघाच्या जागेवर दावा केला होता. तसेच त्यासाठी पाचोरा येथील माजी आमदार आर. ओ. पाटील यांनी तयारीही सुरू केली होती. त्यामुळे या सभेला विशेष महत्त्व प्राप्त झाले होते.
'रावेर'बाबतची चर्चा चुकीची
भाजप-शिवसेना युती झाल्यास शिवसेनेला रावेरची जागा सोडण्याची चर्चा चुकीची असल्याचे सांगत जळगावच्या जागेसाठी शिवसेनेचा आग्रह असल्याचेही आमदार पाटील यांनी या वेळी बोलताना स्पष्ट केले. युतीबाबत अंतिम निर्णय पक्षप्रमुख उद्धव ठाकरे घेतील तो मान्य राहील असेही ते म्हणाले.