जळगावात होणार भूमिगत गटारी

पहिल्या टप्प्यात १३७ कोटींची कामे; निविदा प्रक्रियेस सुरुवात

म. टा. प्रतिनिधी, जळगाव

अमृत योजनेतून २५० कोटी रुपयांच्या पाणीपुरवठा योजनेच्या कामास नुकतीच सुरुवात झालेली असतानाच शहरात १३१.७९ किलोमीटरच्या भूमिगत गटारींच्या प्रस्तावाला सरकारची मंजुरी मिळाली आहे. यामधील पहिल्या टप्प्यातील १३१ कोटी १० लाख रुपयांच्या कामासाठी प्रशासनाने निविदा प्रक्रियेला सुरुवात केल्याची माहिती प्रभारी आयुक्त तथा जिल्हाधिकारी किशोर राजेनिंबाळकर यांनी दिली आहे.

जळगाव महापालिकेचा अमृत योजनेत समावेश करण्यात आला आहे. या माध्यमातून पालिकेला २५० कोटींची पाणीपुरवठा योजना मंजूर करण्यात आली आहे. यात पहिल्या टप्प्यातील १९१ कोटींच्या कामांचे कार्यादेश देण्यात आले. त्यानुसार पालकमंत्री चंद्रकांत पाटील यांच्या हस्ते पाणीपुरवठा योजनेचे भूमिपूजन करण्यात आले. त्यानुसार कामांना सुरुवात झाली आहे. आता अमृतच्या माध्यमातूनच पालिकेला मलनिस्सारण (भूमिगत गटार) योजनादेखील मंजूर करण्यात आली आहे. या भूमिगत गटारींच्या प्रस्तावाला सरकारने तांत्रिक मंजुरी दिली आहे. त्यामधील पहिल्या टप्प्यात १३७ कोटी १० लाख रुपयांची कामे केली जाणार आहे.

या भागात होणार कामे
शहरात या भूमिगत गटारींची कामे गणपती नगर, अंशत: आदर्श नगर, मेहरूण, काव्यरत्नावली जौक, आकाशवाणी चौकामागील भाग, अक्सा नगर, जळगावातील मुख्य एम. जी. रोडच्या पूर्वेकडील बाजूच्या भागात केली जाणार आहेत, अशी माहिती प्रकल्प अभियंता योगेश बोरोले यांनी दिली आहे. नवीन जलकुंभाच्या फाउंडेशनच्या कामांनाही सुरुवात करण्यात आली आहे.

योजनेची माहिती...
पहिल्या टप्प्यात....१३१.७९ किमी भूमिगत गटारी
रायझिंग मेन लार्इन......१५० मीटर
मलप्रक्रिया केंद्र..... ४८ एमएलडी
ड्रेनेज कनेक्शन....४० हजार मालमत्ता