निरीक्षण गृहासाठी सौरऊर्जेचा वापर

म. टा. प्रतिनिधी, जळगाव

येथील मुलामुलींचे जिल्हा निरीक्षण गृह व बालगृहाला वीज वीज पुरवठ्यासाठी अपारंपरिक ऊर्जेचा वापर करता यावा यासाठी सौर ऊर्जा संयंत्रे बसविण्यास मंगळवारी (दि. २३) तिमाही सभेत मान्यता देण्यात आली. त्यासाठी जिल्हा वार्षिक योजनेतून निधी उपलब्ध करून दिला जाईल, असे निर्देश जिल्हाधिकारी किशोर राजे निंबाळकर यांनी दिले.

जिल्हा परिविक्षा व अनुरक्षण संघटनेची तिमाही सभा निरीक्षण गृहात पार पडली. या बैठकीच्या अध्यक्षस्थानी जिल्हाधिकारी किशोर राजे निंबाळकर हे होते. या वेळी जिल्हा महिला व बालविकास अधिकारी रमेश काटकर, संस्थेचे सचिव संजय चौधरी, सदस्य हेमंत फिरके, आशिष अत्तरदे, जयंत पाटील, दत्तात्रय नत्थू चौधरी, वासंती चौधरी, संगीता नेमाडे, अधीक्षक सारिका मेतकर, जयश्री पाटील उपस्थित होते.

या वेळी देण्यात आलेल्या माहितीनुसार, संस्थेतील १०१ मुला मुलींची प्रकरणे निकालात काढण्यात आली. नवीन ७० मुले व २२ मुलींना प्रवेश देण्यात आला. जळगाव येथील निरीक्षण गृहात अव्याहत वीजपुरवठा व्हावा, यासाठी सौर संयंत्रे बसविण्यासाठी मान्यता देण्यात आली. त्यासाठी महाराष्ट्र अपारंपरिक ऊर्जा महामंडळाकडून प्रकल्प अहवाल तयार करून प्रस्ताव सादर करण्यात यावा, असे निर्देश जिल्हाधिकारी निंबाळकर यांनी दिले.

संस्थेतील प्रवेशित मुलामुलींना एमएससीआयटी संगणक प्रशिक्षणासाठी संस्थेला मदत उपलब्ध करून देण्यासाठी आवाहन करण्याचेही ठरविण्यात आले. या वेळी संस्थेतील कर्मचाऱ्यांचे वेतन, सन २०१६-१७ कालावधीतील जमा खर्च तपशिल आदी अहवाल यावेळी सादर करण्यात आले. अधिक्षीका सारिका मेतकर यांनी सभेचे सूत्रसंचालन व आभार मानले.