विचित्र अपघातात पाच जखमी

म. टा. प्रतिनिधी, जळगाव

भुसावळकडून जळगावकडे येणाऱ्या व्हॅनचालकाने ओव्हटेक करण्याच्या नादात समोरून येणाऱ्या ट्रकला जोरदार धडक दिल्याची घटना शनिवारी सकाळी १० वाजता घडली. कडगाव फाट्याजवळील उड्डाण पुलाजवळ झालेल्या या अपघातात व्हॅन, अॅपे रिक्षाच्या प्रवाशांसह मोटारसायकलस्वार जखमी झाला.

भुसावळ येथून हरिषकुमार बडेजा, सुनील चेहलानी, कलाबाई ठाकूर, अमिनाबाई शकील (सर्व रा. भुसावळ) हे व्हॅन (एमएच १९ बीजे ४७२५) ने अंत्यविधीसाठी जळगावकडे येत होते. चालक त्याच्या पुढे चालणाऱ्या (एमएच १९ व्ही ८८६९) क्रमांकाच्या रिक्षाचालक संजय पाटील (रा. मन्यारखेडा) याला ओव्हटेक करीत त्याच्याशी गप्पा करीत होता. याचवेळी जळगावकडून भुसावळकडे जाणाऱ्या (जीजे १२ ऐएम ९६११) क्रमांकाच्या ट्रकला व्हॅनचालकाने जोरदार धडक दिली. या अपघातात जळगावकडे येत असलेली (एमएच १९ व्ही ८८६९) क्रमांकाची रिक्षादेखील ट्रकवर जावून आदळली.
महामार्गावरील उड्डाणपुलावर झालेल्या विचित्र अपघातात पाच जण जखमी झाले.

पोलिसाविरुद्ध गुन्हा दाखल
जळगाव : महिलेची स्वाक्षरी घेण्यासाठी गेलेल्या पोलिस कर्मचाऱ्याने महिलेचा विनयंभग केल्याची घटना बुधवारी घडली होती. परंतु, पोलिस कर्मचाऱ्याविरुद्ध कोणतीच कारवाई न झाल्यामुळे पीडित महिलेसह विश्वकर्मा सेनेच्या कार्यकर्त्यांनी पोलिस अधीक्षकांची भेट घेऊन घडलेल्या प्रकाराची माहिती देत निवेदन दिले. शनिवारी पीडितेच्या फिर्यादीवरून कॉन्स्टेबल योगेश वाघ याच्याविरुद्ध विनयभंगाचा गुन्हा दाखल करण्यात आला आहे.
या कर्मचाऱ्याविरुद्ध गुन्हा दाखल नसल्याने पीडित महिलेसह विश्वकर्मा सेनेचे अध्यक्ष राजेंद्र निकम, विश्वकर्मा वंशीय समाज संघटन अध्यक्ष योगेश व्हिरोळकर, महिला नारी शक्ती संघटना अध्यक्षा निताताई सांगोळे यांच्यासह समाजबांधवानी अधीक्षक दत्ता शिंदे यांची भेट घेऊन त्यांना घडलेल्या प्रकाराबाबत माहिती दिली.