वर्सी महोत्सवाची आज सांगता

म. टा. प्रतिनिधी, जळगाव

पूज्य अमर शहीद संत कंवरराम यांचा ६० वा, पूज्य संत हरदासराम यांच्या ४० तर संत बाबा गेलाराम यांच्या नवव्या वर्सी महोत्सवाची आज (दि. ११) रोजी पल्लवने सांगता होणार आहे.

गेल्या ५० वर्षांपासून सुरू असलेल्या सिंधी समाजाचे अमर शहीद संत कंवरराम साहब व संत बाबा हरदासराम साहब गोदडीवालेबाबा व संत बाबा गेलाराम साहब यांचा वर्सी महोत्सव तीन दिवसांपासून सुरू आहे. महोत्सवात आज सायंकाळी भक्तीमय वातावरणात आणि हजारो भाविकांच्या उपस्थितीत अखंड पठन व भोगसाहब पार पडला. याप्रसंगी भाविकांनी विश्वशांतीसाठी प्रार्थना केली. त्यानंतर सांई राजेशकुमार, सांई चांडूराम साहेब, बलरामसांई, देवीदासभाई यांनी आपल्या प्रवचनातून संताची सेवा कशी करावी, आदर्श जीवन कसे जगावे याविषयी संतांच्या कार्याचे दाखले देवून त्यांना मार्गदर्शन केले.

आमदार एकनाथ खडसे व माजी आमदार सुरेश जैन यांनी सायंकाळी सात वाजेच्या सुमारास वर्सी महोत्सवाला भेट देऊन दर्शन घेतले. यावेळी संत मनोहरलाल यांचे नातू साई राजेशकुमार यांच्या हस्ते आमदार एकनाथ खडसे आणि सुरेश जैन यांचा एक शाल देऊन सत्कार करण्यात आला.