'विवेक' मॅरेथानला धावली चिमुकली

दोन हजार विद्यार्थ्यांचा सहभाग

म. टा. प्रतिनिधी, जळगाव

विवेकानंद संचलित शहरातील सर्व शाळांच्या वतीने शनिवारी (दि. १२) विवेक रन मॅरेथॉन या उपक्रमाचे आयोजन करण्यात आले होते. या मॅरेथॉनमध्ये सुमारे २ हजार विद्यार्थ्यांनी सहभाग घेतला होता.

विवेकानंद प्रतिष्ठान व रनर्स ग्रुप यांच्या संयुक्त विद्यमाने विवेक रन मॅरेथॉन स्पर्धेचे आयोजन खान्देश सेंट्रल मॉल येथून करण्यात आले होते. यावेळी प्रमुख पाहुणे म्हणून अप्पर पोलिस अधीक्षक बच्चनसिंग होते. मान्यवरांच्या हस्ते हिरवी झेंडी दाखवून सकाळी ६.३० वाजेच्या सुमारास मॅरेथॉनला सुरुवात झाली. मॅरेथॉन स्पर्धेत इयत्ता ५ ते ७ वी व इयत्ता ८ वी ते १० वी तर एक गट शिक्षक व शिक्षकेतर कर्मचारी व रनर्स ग्रुपचे सदस्यांचा असे तीन गट बनविण्यात आले होते.

यावेळी विवेकानंद प्रतिष्ठान संचलित असलेल्या सर्व शाळांमधील सुमारे २ हजार विद्यार्थी व २५० शिक्षक शिक्षकेतर कर्मचारी मॅरेथॉनमध्ये सहभागी झाले होते. स्पर्धकांनी ५.५ किलोमीटर अंतर पार करून विवेक रन पूर्ण केली. यावेळी रनर्स ग्रुपचे डॉ. रवी हिरानी, विवेकानंद प्रतिष्ठानच्या अध्यक्षा शोभाताई पाटील, पुनम मानधुने, रत्नाकर गोरे, नंदकुमार जंगले यांच्यासह शिक्षक, कर्मचारी व रनर्स ग्रुपचे सदस्य उपस्थित होते.

असा होता मॅरेथॉनचा मार्ग

विवेक मॅरेथॉनला खान्देश सेंट्रल मॉल येथून सुरुवात करण्यात आली. त्यानंतर कोर्ट चौक, छत्रपती शिवाजी महाराज क्रीडा संकुल, स्वातंत्र्य चौक, प्रभात चौकामार्गे रिंगरोड, ख्वॉजामियाँ दर्गा रोड, नूतन मराठा महाविद्यालय, कोर्ट चौकामार्गे पुन्हा खान्देश सेंट्रल मॉलमध्ये मॅरेथॉनचा समारोप करण्यात आला. विवेक मॅरेथॉनमध्ये विवेकानंद प्रतिष्ठान संचलित शाळांमधील सुमारे २ हजार विद्यार्थ्यांसह ज्येष्ठ नागरिकदेखील सहभागी होऊन त्यांनी ५ किलोमीटरची मॅरेथॉन पूर्ण केली.