प्रभागरचना उद्या समजणार

शहरातील १९ प्रभागांच्या ७५ वॉर्डांसाठी आरक्षण सोडत; ९ एप्रिलला प्रसिद्धी

म. टा. प्रतिनिधी, जळगाव

महापालिकेच्या निवडणुकीसाठी तयार करण्यात आलेली प्रभागरचना येत्या सोमवारी (दि. ९) अधिकृतरित्या प्रसिद्ध होणार असली तरी उद्या (दि. ४) आरक्षण सोडतीवेळी ती माहितीसाठी फलकावर लावण्यात येणार आहे, अशी माहिती पालिका प्रशासनाकडून देण्यात आली आहे. उद्या (दि. ४) सकाळी ११ वाजता पालिकेत शहरातील एकूण १९ प्रभागांमधील ७५ वॉर्डांसाठी ही सोडत काढण्यात येणार आहे.

यंदाची निवडणूक बहुसदस्यीय प्रभागरचनेनुसार होणार असल्याने राजकीय समीकरणे बदलणार आहेत. नव्या प्रभागरचनेत पूर्वीची आरक्षणे कायम राहण्याची शक्यता आहे. त्यामुळे त्या-त्या पक्षातील इच्छुकांनी आतापासूनच त्या दृष्टीने तयारी सुरू करून आडाखे बांधण्यास सुरुवात केलेली आहे. महापालिकेच्या निवडणुकीसाठी प्रारुप प्रभागरचनेला मंजुरी मिळाली असून, उद्या ती महापालिकेच्या सभागृहात काढली जाणार आहे.

इच्छुकांमध्ये उत्सुकता

शहरातील या विविध भागातून आता निवडणूक जवळ येताच इच्छुकांनी आपापल्या परीने तयारीस सुरुयवात केली असून, पक्षाच्या ज्येष्ठांकडेही जोर लावायला सुरुवात केली आहे. सामाजिक कार्यक्रमात सक्रिय सहभाग, नागरिकांसोबत चर्चा, संवाद आणि संपर्क वाढविण्याचाही प्रयत्न हे इच्छुक करीत आहेत. प्रभागरचना जाहीर करण्याची तारीख ९ एप्रिल असली तरी आरक्षण सोडतीच्या दिवशीच प्रभागरचना माहितीसाठी महापालिकेच्या फलकावर लावली जाणार आहे. त्यामुळे बुधवारीच शहरातील प्रभागांचे चित्र स्पष्ट होणार आहे. इच्छुक मंडळीकडून आपला प्रभाग किती विस्तारेल, मतदारांशी संख्या किती असणार आहे, नव्याने समाविष्ट होणाऱ्या भागातील मतदारांपर्यंत पोहचण्यासाठी काय-काय करावे लागेल, याची चाचपणी केली जात आहे. इच्छुक गुडघ्याला बाशिंग बांधून तयार असले तरी प्रभागरचना जाहीर न झाल्याने नेमके कुठे काम करावे, याबाबत संभ्रम असल्याने ते प्रभागरचनेची आतुरतेने प्रतीक्षा करीत आहेत.त्यामुळे आता विद्यमान नगरसेवक व इच्छुकांमध्ये प्रचंड उत्सुकता निर्माण झाली आहे.

१८ प्रभागात ४ तर एकात ३ वॉर्ड

बहुसदस्यीय प्रभागरचनेनुसार महापालिकेची सार्वत्रिक निवडणूक होणार आहे. त्यात एका प्रभागात चार नगरसेवकांचा समावेश असणार आहे. महापालिकेची एकूण सदस्य संख्या (७५) विचारात घेता प्रभागांची संख्या घटणार आहे. १८ प्रभागांमध्ये ४ तर एका प्रभागात ३ वॉर्डाचा (सदस्यांचा) समावेश असणार आहे. नव्या प्रभागरचनेनुसार भौगोलिकदृष्ट्या प्रभागाचा विस्तार वाढणार आहे. तसेच प्रभाग व त्यात अ, ब, क, ड नुसार वॉर्ड असणार आहेत. येत्या सोमवारपासून त्यावर सूचना व हरकती मागविण्यात येणार असून, आरक्षणाची माहिती सर्वांना व्हावी यासाठी माहितीपत्रकही छापणार असल्याची माहिती महापालिका प्रशासनाने दिली. आरक्षण सोडतीचे स्थानिक वृत्तवाहिन्यांना विनंती करून थेट प्रक्षेपण करण्याची विनंती केली जाणार आहे.


आरक्षणाबद्दल माहिती (सन २०११ च्या जनगणनेनुसार, ४ लाख ६० हजार २२८)
...................................................................................
प्रवर्ग.........................................पुरुषांसाठी राखीव......महिला
अनुसूचित जाती (एससी)................५..........................३
अनुसूचित जमाती (एसटी)..............४..........................२
इतर मागासवर्गीय (ओबीसी)...........२०.........................१०
खुला प्रवर्ग (जनरल)...................४६...........................२३
...................................................................................
एकूण सदस्यसंख्या.........................७५.......................३८ सदस्य