अवाजवी शुल्क वाढीविरोधात अभाविपचा आंदोलनाचा इशारा

म. टा. प्रतिनिधी, जळगाव

शासकीय अभियांत्रिकी महाविद्यालयाच्या जळगीतील वसतिगृहाची अवाजवी शुल्क वाढीविरोधात आंदोलन छेडण्याचा इशारा ‘अभाविप’ने प्राचार्यांना निवेदनाद्वारे दिला आहे.

नवीन शैक्षणिक वर्ष सुरू झाले आहे. विद्यार्थ्यांना अवाजवी शुल्क वाढीला सामोरे जावे लागत आहेत. मागील शैक्षणिक वर्षी २०५० रुपये असलेले वसतिगृह शुल्क तिपटीने वाढून ६४५० पर्यंत करण्यात आले आहे. या शुल्कवाढी विरोधात अभाविपने नुकतेच शासकीय अभियांत्रिकीच्या प्राचार्यांना निवेदन दिले. या आवास्तवपणे शुल्क वाढीमुळे विद्यार्थ्यांना आर्थिक समस्येला सामोरे जावे लागत आहे. यंदाच्या वर्षी शैक्षणिक फीमध्ये मोठ्या प्रमाणात वाढ झाल्याने हे शुल्क कमी करण्याची मागणी या निवेदनाद्वारे करण्यात आली आहे. या वेळी प्राचार्यांनी या संदर्भात व्यवस्थापन परिषदेच्या बैठकीत निर्णय घेऊ, असे आश्वासन ‘अभाविप’च्या शिष्टमंडळाला दिले. जोपर्यंत निर्णय होत नाही तोपर्यंत विद्यार्थ्यांना फक्त ५०० रुपये शुल्क भरून प्रवेश द्यावा व उर्वरित शुल्क निर्णय झाल्यानंतर भरावे, ही अभाविपची मागणी प्राचार्यांनी मान्य केली. शुल्कवाढ कमी झाली नाही तर आंदोलनाचा इशारा अभाविपने दिला आहे. शिष्टमंडळात महानगरमंत्री विराज भामरे, ललित तोगे, कृष्णा बिर्ला, शशिकांत बाबर, आकाश महाजन, अजय पाशावार, नितीकेश राऊत, माधव तपरे यांचा समावेश होता.