विद्यार्थ्यांकडून नाटिकेद्वारे जलप्रबोधन

म. टा. प्रतिनिधी, जळगाव

पावसाची अनियमितता, पडलेल्या पावसाच्या पाण्याचा नियोजनाच्या अभावामुळे पाणीटंचाईचे संकट अधिकच तीव्रतेने जाणवत आहे. हे संकट भविष्यात दूर करावयाचे असेल तर वृक्षलागवडीसह पाणी जपून वापरले पाहिजे, यासाठी प्रत्येकाने प्रयत्न करण्याची गरज असल्याचा संदेश काशिनाथ पलोड इंग्लिश मीडियम स्कूलच्या विद्यार्थ्यांनी सादर केलेल्या नाटिकेतून दिला.

विवेकानंद प्रतिष्ठान संचालित काशिनाथ पलोड इंग्लिश मीडियम स्कूल येथे भवरलाल अॅण्ड कांताबाई जैन फाउंडेशन आणि जैन इरिगेशन सिस्टिम्स लि. यांच्या संयुक्त विद्यमाने ‘जलसंरक्षण अभियाना’निमित्त पोस्टर्स प्रदर्शन भरविण्यात आले. पोस्टर प्रदर्शनाच्या उद्घाटनप्रसंगी स्कूलचे प्राचार्य अमितसिंह भाटिया, जैन इरिगेशनचे सहकारी दिनेश दीक्षित, आनंद पाटील उपस्थित होते. रोपट्याला पाणी देऊन उद्घाटन करण्यात आले.

याप्रसंगी जैन इरिगेशनच्या सहकाऱ्यांनी जलसंरक्षण अभियानाबाबत सादरीकरण केले. या वेळी सातवीच्या विद्यार्थ्यांनी ‘पाणी वाचवा’ हा संदेश देणारी नाटिका सादर केली. यामध्ये प्रांजल जगताप, जिज्ञासा झंवर, कणक पाटील, तनुष्का पाटील, आर्या चौधरी, सोहम महाजन, खुशांत भंगाळे, मानस मेश्राम, पराग भोरटक्के, मानव मेहता, आर्यन माळी यांचा सहभाग होता. या उपक्रमासाठी वर्ग शिक्षक कल्पना सूर्यवंशी, संगीता तळेले, आरती केंकरे, नम्रता कुळकर्णी, मंजुषा भिडे, संगीता खन्ना, मोनाली पाटील, स्वाती देशमुख, रूपाली पाटील, योगेश पाटील, विकास कोळी, इमरान खाटीक, जयेश देशमुख, संतोष बडगुजर यांच्यासह शिक्षक व शिक्षकेतर कर्मचाऱ्यांनी सहकार्य केले. समारोपावेळी सर्व विद्यार्थ्यांनी जलबचतीची प्रतिज्ञा घेतली.