पाणीबचतीसाठी ‘जलदौड’

‘पाणी अडवा, पाणी जिरवा’चा संदेश देत जळगावकरांची प्रतिज्ञा

म. टा. प्रतिनिधी, जळगाव

‘पाणी अडवा, हरितक्रांती घडवा’, ‘पाणी वाचवा, दुष्काळ हटवा’, ‘जल है तो कल है’ अशा घोषणांमधून पाणी बचतीचा संदेश देत रविवारी (दि. १९) सकाळी जळगावकर ‘वॉटर रन’ अर्थात ‘जलदौड’ मध्ये मोठ्या संख्येने सहभागी झाले.

जागतिक जलदिनानिमित्त १६ ते २२ मार्च या कालावधीत जलजागृती सप्ताह राबविण्यात येत आहे. यानिमित्त ‘जलदौड’ आयोजित करण्यात आली होती. यात जिल्हाधिकारी किशोर राजे निंबाळकर, महापौर नितीन लढ्ढा, आमदार चंदुलाल पटेल, आमदार सुरेश भोळे, जिल्हा परिषदेचे मुख्य कार्यकारी अधिकारी आस्तिककुमार पाण्डेय, तापी पाटबंधारे विकास महामंडळाचे

कार्यकारी संचालक व्ही. एम. राजपूत, जळगाव पाटबंधारे विभागाचे अधीक्षक अभियंता सु. प्र. सैंदाणसिंग, कार्यकारी अभियंता संजीव चोपडे, जी. एम. फाऊंडेशनचे अरविंद देशमुख, पितांबर भावसार, नीर फाऊंडेशनचे सागर महाजन आदी मान्यवर उपस्थित होते. काव्य रत्नावली चौकातून या दौडचा प्रारंभ झाला.

यावेळी सुरुवातीला सामुहिक जलप्रतिज्ञा घेण्यात आली. त्यानंतर ग्लॅडिएटर ग्रुपच्या विद्यार्थ्यांनी संगीताच्या तालावर रोड मार्च सादर केला. त्यानंतर उपस्थित मान्यवरांच्या हस्ते हिरवी झेंडी दाखवून जल दौडची सुरुवात करण्यात आली. काव्य रत्नावली चौकातून आकाशवाणी चौक, जिल्हाधिकारी कार्यालय, स्वातंत्र्य चौक, स्टेडियममार्गे ही दौड शिवतीर्थ मैदानावर आली आणि तेथे या दौडचा समारोप करण्यात आला. याठिकाणी मान्यवरांच्या हस्ते सहभागी धावपटूंना प्रमाणपत्र देण्यात आले. या जलदौडमध्ये जैन इरिगेशन, जैन स्पोर्टस, जळगाव रनर्स ग्रुप, युवा शक्ती ग्रुप, यांच्यासह शहरातील विविध शाळा, महाविद्यालयांचे विद्यार्थी, विद्यार्थिनी, अधिकारी, नागरिक मोठ्या संख्येने सहभागी झाले होते. कार्यक्रमाचे सूत्रसंचालन फारुख शेख यांनी केले.