मंदिरं उघडण्याच्या निर्णयानंतर स्वच्छता मंत्र्यानी दिला 'हा' सावधानतेचा इशारा

जळगाव: राज्य सरकारने दिवाळीच्या पाडव्यापासून मंदिरे, धार्मिक स्थळे उघडण्यास परवानगी दिली आहे. मात्र, करोनाच्या संभाव्य दुसऱ्या लाटेच्या पार्श्वभूमीवर लोकांनी स्वयंशिस्त पाळणे गरजेचे आहे, असे आवाहन राज्याचे सर्वजनिक पाणीपुरवठा व स्वच्छता मंत्री गुलाबराव पाटील यांनी केले आहे.

वाचा: शिर्डीचं साई मंदिर उद्यापासून होणार खुले; दर्शनाला जाण्याआधी 'हे' वाचा!

गुलाबराव पाटील दिवाळीसाठी पाळधी गावी आपल्या निवासस्थानी होते. यावेळी ते पत्रकारांशी बोलत होते. गुलाबराव पाटील यांनी राज्यातील जनतेला दिवाळीच्या शुभेच्छा दिल्या. त्यानंतर ते पुढे म्हणाले की, कोरोनाचा प्रादुर्भाव वाढल्यानंतर राज्यात लॉकडाऊन जाहीर करण्यात आला. त्यामुळे मंदिरे तसेच सर्व प्रकारची धार्मिक स्थळे बंद ठेवण्यात आली. त्यानंतर राज्यभरातील मंदिरे व धार्मिक स्थळे उघडण्यात यावी, अशी मागणी केली जात होती. मुख्यमंत्री उद्धव ठाकरेंनी कोरोनाचा प्रादुर्भाव आटोक्यात आल्यानंतर मंदिरे तसेच धार्मिक स्थळे उघडण्यात येतील, असे सांगितले होते. कोरोनाचा संसर्ग आता काही प्रमाणात आटोक्यात येत आहे. कोरोनाची रुग्णसंख्या महाराष्ट्रासह देशभरात कमी होत असल्याने मुख्यमंत्री उद्धव ठाकरेंनी दिवाळी पाडव्यापासून मंदिरे, धार्मिक स्थळे उघडण्यात येणार असल्याचे सांगितले आहे. भक्तगणांची मागणी लक्षात घेऊन त्यांनी हा निर्णय घेतला आहे, असे गुलाबराव पाटील यांनी सांगितले.

वाचा: रोहिणी खडसे यांना करोनाची लागण; रुग्णालयात दाखल

राज्यभरातील मंदिरे तसेच धार्मिक स्थळे पाडव्याच्या मुहूर्तावर उघडण्यात येणार आहेत. परंतु, लोकांनी करोनाचा प्रादुर्भाव लक्षात घेऊन स्वयंशिस्त पाळणे गरजेचे आहे. 'डब्ल्यूएचओ'ने कोरोनाच्या दुसऱ्या लाटेचा अंदाज वर्तवला आहे. त्यामुळे प्रत्येकाने खबरदारी घेण्याची गरज आहे. लोक निश्चितच फिजिकल डिस्टन्सिंग, हँड सॅनिटायझेशनचे नियम पाळतील, अशी आशा असल्याचेही यावेळी गुलाबराव पाटील यांनी सांगितले.