‘अपक्ष उमेदवारांना पुरस्कृत करणार’

म. टा. प्रतिनिधी, जळगाव

जळगाव महापालिका निवडणूक लढविणाऱ्या अपक्ष उमेदवारांना प्रजासत्ताक लोकराज्य पार्टीतर्फे पुरस्कृत करून ओबीसी-बहुजन विकास आघाडीतर्फे प्रचारासाठी मदत करणार असल्याची माहिती अध्यक्ष अनिल महाजन यांनी मंगळवारी पत्रकार परिषदेत दिली. आघाडीकडून ८ उमेदवाराचे अर्ज दाखल करण्यात आल्याचेही त्यांनी सांगितले.

महापालिका निवडणूक २०१८ प्रजासत्ताक लोकराज्य पार्टी पुरस्कृत ओबीसी-बहुजन विकास आघाडीच्या वतीने गणेश सोनवणे नामदेव कोळी, राजेंद्र निकम, शुभम खैरनार, नितीन जाधव, नीता सांगोळे यांचे अर्ज दाखल करण्यात आले. मोठ्या पक्षातील दिगग्ज उमेदवार ओबीसी-बहुजन विकास आघाडीच्या संपर्कात असल्याचेही त्यांनी सांगितले. राजकीय पक्षाचे ए.बी. फॉर्म मिळणार नाही त्यांनाही पुरस्कृत करून २५ ते ३० जागा ओबीसी -बहुजन विकास आघाडी लढणार असल्याचे ते म्हणाले.

नोंदणी नसल्याने ‘आप’ निवडणुकीच्या बाहेर
आम आदमी पार्टीची अधिकृत संघटनात्मक नोंदणी राज्य निवडणूक आयोगाकडे अद्याप झालेली नाही. पक्षाला निवडणुकीचे चिन्ह मिळाले नसल्याने महापालिकेची निवडणूक लढविणार नसल्याची माहिती आम आदमीचे महानगराध्यक्ष ईश्‍वर मोरे यांनी मंगळवारी पत्रकार परिषदेत दिली.
आम आदमी पार्टीपक्षाच्या उमेदवारांकडून महापालिकेची निवडणूक लढविणार असल्याची घोषणा देखील त्यांच्याकडून करण्यात आली होती. यासाठी महाराष्ट्राची अधिकृत संघटनात्मक घोषणा करून अधिकृत नोंदणीसाठी त्यांनी आयोगाकडे प्रस्ताव सादर करण्यात आला होता. परंतु, अद्याप संघटनेची नोंदणी झालेली नाही. यासाठी वरिष्ठांची चर्चा करून निवडणूक न लढविण्याचा निर्णय घेण्यात आला असल्याचे मोरे यांनी सांगितले. यावेळी आशिष जाधव, अनिल वाघ उपस्थित होते.