पत्नीची हत्या करून आत्महत्या

म. टा. प्रतिनिधी, जळगाव

तालुक्यातील असोदा येथे चारित्र्याच्या संशयावरून मद्यपी पतीने पत्नीची गळा आवळून हत्या केली. त्यानंतर स्वत:ला धावत्या रेल्वेखाली झोकून देत आत्महत्या केल्याची घटना घडली.

असोदा येथील धनजी नगरातील योगेश गौतम बिऱ्हाडे (वय ३२) यांचा ४ वर्षांपूर्वी शिरसोली येथील सीमा यांच्याशी विवाह झाला होता. योगेश याला दारूचे व्यसन असल्याने तो नेहमी पत्नीला मारहाण करीत असल्याने दोघांमध्ये वाद होत असल्याचे नातेवाईकांनी सांगितले.

गुरुवारी (दि. १४) पती-पत्नीमध्ये दुपारी वाद झाला होता. ग्रामपंचायत कार्यालयापासून मद्यपी योगेशने पत्नी सीमा हिला मारत मारत घरी नेले होते. रात्रीदेखील त्यांच्यात वाद झाल्याचे परिसरातील नागरिकांनी सांगितले. रात्री १०.३० वाजेपूर्वी पती योगेश याने घरातील टीव्ही केबलच्या वायरने पत्नी सीमाचा गळा आवळून हत्या केली. त्यानंतर राहत्या घरून पळून गेला. रात्री पावणेबारा वाजता सीमा यांच्या घराचा दरवाजा उघडा असल्याने परिसरातील नागरिकांनी आत पाहिले असता सीमा घरात मृत अवस्थेत आढळून आल्या. योगेश याने पळून जाऊन स्वत:ची बहीण व मेहुण्यांना पत्नीने आत्महत्या केल्याची माह‌िती दिली.

नागरिकांनी घटनेची माहिती पोलिस पाटील यांना दिली. त्यांनी घटनास्थळ गाठून याबाबत तालुका पोलिसांना माहिती कळविली. पोलिस व नागरिकांच्या मदतीने मृतदेह शवविच्छेदनासाठी गुरुवारी रात्री १२.३० वाजेच्या सुमारास जिल्हा रुग्णालयात आणण्यात आला. शुक्रवारी सकाळी शवविच्छेदन करून मृतदेह नातेवाईकांच्या स्वाधीन करण्यात आला.

यानंतर सीमा गळफास घेवूच शकत नाही, असा दावा करत तिच्या माहेरच्या नातेवाईकांनी योगेश बिऱ्हाडे यानेच तिला जीवे ठार मारले, असा आरोप केला.

योगेश हा रात्रीच्या घटनेनंतर आपल्या मेहुण्यांकडे गेला व घटनेबाबत त्यांना माहिती दिली. त्याचे मेहुणे त्याला गाडीवर बसवून पोलिस स्टेशनला घेऊन येत असतानाच योगेशने अर्ध्या रस्त्यातूनच गाडीवरून उडी मारून पळ काढला.

रेल्वेखाली झोकून देत आत्महत्या

अवघ्या काही तासांनंतर आसोदा रेल्वेगेटपासून दोन क‌िलोमीटर अंतरावर तरसोददरम्यान त्याने धावत्या रेल्वे समोर झोकून देवून आत्महत्या केली. घटनेची माहिती मिळताच तालुका पोलिसांनी घटनास्थळी धावत घेत योगेशच्या मृतदेहाचा पंचनामा केला. घटनास्थळी तालुका पोलिस स्टेशनचे पोलिस निरीक्षक अशोक रत्नपारखी व पीएसआय पाटील, पो. कॉ. जितेंद्र पाटील, धर्मेंद्र ठाकूर, शैलेंद्र चव्हाण यांनी भेट देवून पंचनामा केला.