चोरट्यांनी हद्द केली! आधी महिलेचे मंगळसूत्र हिसकावले आणि पळून जाताना...

जळगाव: भरधाव दुचाकीवरून आलेल्या दोन भामट्यांनी पायी चालणाऱ्या महिलेच्या गळ्यातील मंगळसूत्र तोडले. त्यानंतर पुढे जाऊन हात उंचावून तोडलेले मंगळसूत्र महिलेला दाखवून दोघांनी पोबारा केला. जळगावातील ईश्वर कॉलनीत बुधवारी रात्री ही घटना घडलीय. या प्रकरणी एमआयडीसी पोलीस ठाण्यात दोन जणांविरुद्ध गुन्हा दाखल करण्यात आला आहे.

वाचा: धक्कादायक! पत्नी व सासरच्या त्रासाला कंटाळून जवानाची आत्महत्या

शीतल संजय रोकडे (वय ५२ रा. ईश्वर कॉलनी) या काल सायंकाळच्या सुमारास त्यांच्या नातलगांना भेटायला गेल्या होत्या. भेट झाल्यावर आठ वाजेच्या सुमारास पुन्हा ईश्वर कॉलनीत घराकडे पायी परतत असताना मोटार सायकलवर समोरून आलेल्या दोन जणांपैकी मागे बसलेल्याने रोकडे यांच्या गळ्यातील ३५ हजार रुपये किंमतीचे मंगळसूत्र हिसकावले. काही अंतर पुढे गेल्यानंतर तोडलेले मंगळसूत्र हात वर करून रोकडे यांना दाखवले. त्यानंतर भरधाव वेगाने दोघेही निघून गेले. या प्रकरणी शीतल रोकडे यांनी दिलेल्या तक्रारीनुसार, एमआयडीसी पोलिसात दोन जणांविरुद्ध गुन्हा दाखल करण्यात आला आहे. पुढील तपास सहाय्यक पोलीस निरीक्षक प्रमोद कठोरे करीत आहेत.

असे आहे संशयिताचे वर्णन

शीतल रोकडे यांनी पोलिसांना दिलेल्या माहितीनुसार, मोटार सायकलवर असलेले दोन्ही चोरटे हे विशीतले होते. त्यांच्या अंगात काळ्या रंगाचे जॅकेट आणि डोक्यावर टोपी होती. पोलिसांनी या दोघांचाही शोध सुरू केला आहे.

वाचा: मनमाडमधील तरुणाच्या खुनाचा उलगडा; सत्य समोर आल्यानंतर पोलीसही चक्रावले!