म. टा. प्रतिनिधी, जळगाव
वाचन ही आपल्याला समृद्ध करणारी गोष्ट आहे. वाचनामुळे आपल्या आयुष्याला आकार मिळतो. वाचनामुळे शब्द कळतात. शब्दमांडणीची ताकद कळते, आपले शब्दभांडार तयार होते. म्हणूनच वाचन ही आपली गरज बनली पाहिजे, असे मत लेखक, दिग्दर्शक, अभिनेते योगेश सोमण यांनी व्यक्त केले.
शासनाच्या वतीने डॉ. ए. पी. जे. अब्दुल कलाम यांचा जन्मदिवस वाचन प्रेरणा दिन म्हणून साजरा केला जातो. त्यानिमित्त एम. जे. महाविद्यालयातील मराठी विभागाच्या वतीने योगेश सोमण यांचे ‘वाचन आणि मी’ या विषयावर व्याख्यान आयोजित करण्यात आलेले होते.
सोमण पुढे म्हणाले, वाचनातून आपल्यातील विद्यार्थ्यांना लिहिण्याचे बळ मिळेल. वाचकांनी एकाच विषयाचे विविध पैलू समजून घेतले पाहिजेत, असेही ते म्हणाले. यावेळी त्यांनी वाचलेल्या ऐतिहासिक कादंबऱ्या, चरित्रे, कवितासंग्रह यांचे अनेक दाखले दिले. मला लेखक म्हणून वाचनाची खूप मदत झाल्याचे ते म्हणाले. वाचन ही आपल्याला आत्मिक आनंद देणारी गोष्ट आहे. पुस्तकं आपले मित्र झाले पाहिजेत. ती आपल्याला जगण्याची लढाई शिकवतात. आवड जोपासायची म्हणून वाचन करा आणि आपले आयुष्य समृद्ध करा, असेही ते म्हणाले.
वेदना ही अनुभवण्याची गोष्ट आहे. वेदनेतून लेखनाचा जन्म झाला पाहिजे. तेच अस्सल लेखन असते, असे मत त्यांनी व्यक्त केले. कविता वाचण्यासोबत आपण कवीही वाचले पाहिजेत. आरती प्रभू, ग्रेस, कुसुमाग्रज, बोरकर, जी. ए. कुलकर्णी हे माझे आवडते कवी लेखक असल्याचेही सोमण यांनी सांगितले.
अध्यक्षस्थानी महाविद्यालयाचे प्राचार्य डॉ. उदय कुलकर्णी होते. आपल्या व्यक्तिमत्व विकासासाठी वाचन अपरिहार्य आहे असे मत त्यांनी व्यक्त केले. व्यासपिठावर कला विद्याशाखेचे उपप्राचार्य डॉ. सुरेश तायडे, समन्वयिका डॉ. प्रज्ञा जंगले, मराठी विभागप्रमुख डॉ. विद्या पाटील उपस्थित होते.
पुस्तक प्रदर्शनाला प्रतिसाद
सोहम सभागृहात ए. पी. जे. अब्दुल कलाम यांच्या पुस्तकांचे प्रदर्शन भरविण्यात आले होते. तसेच ए. पी. जे. अब्दुल कलाम यांच्याविषयी विद्यार्थ्यांनी तयार केलेली पोस्टर्स लावण्यात आली होते. प्रा. योगेश महाले यांनी सूत्रसंचालन व आभार मानले. कार्यक्रमाला प्रा.चारुता गोखले, प्रा. गणेश सूर्यवंशी, प्रा.दीनानाथ पाठक, प्रा. विजय लोहार, प्रा.संगीता चद्रात्रे, डॉ. सविता नंदनवार, डॉ. भाग्यश्री भलवतकर व महाविद्यालयातील विद्यार्थी मोठ्या संख्येने उपस्थित होते.