रेल्वेखाली झोकून तरुणाची आत्महत्या

जळगाव : पारोळा तालुक्यातील सार्वे येथील २५ वर्षीय तरुणाने जळगावातील सुरत रेल्वे गेटजवळील रुळावर रेल्वेखाली झोकून देत आत्महत्या केल्याची घटना रविवारी (दि. २२) दुपारी २.३० वाजेच्या सुमारास घडली. खिश्यात मिळून आलेल्या कागदपत्रावरून मृताची दोन तासानंतर ओळख पटली.

राजु एकनाथ मकासरे (वय २५ रा. सार्वे ता. पारोळा) असे मृताचे नाव आहे. राजूचा एक वर्षापूर्वीच विवाह झाला होता. तो हातमजुरी करून आपला उदरनिर्वाह करीत होता. तो कामानिमित्त नेहमी सुरत येथे जात असे. तो दिवाळी असल्यामुळे गावाकडे आला होता. रविवारी दुपारी २.३० वाजेच्या पूर्वी सुरत रेल्वेगेट क्रमांक १४८ जवळील खांबा क्रमांक ३०४/११-१२ जवळ धावत्या रेल्वेखाली झोकून देत आत्महत्या केली. राजूची पत्नी साधना प्रसुतीसाठी माहेरी गेली होती. त्याच्या पश्चात आई-वडील, मोठा भाऊ, वहिनी, पत्नी, मुलगी, बहीण असा परिवार आहे.