जि.प. कर्मचाऱ्यांचे लेखणी बंद आंदोलन

म. टा. प्रतिनिधी, जळगाव

जिल्हा सेवा वर्ग -३ (लेखा) श्रेणी -१मध्ये असलेले पद सहाय्यक लेखा अधिकारी यांना राजपत्रित दर्जा देण्यात यावा यासह शासनाकडे प्रलंबित असलेल्या मागण्यासाठी जिल्हा परिषद लेखा कर्मचारी संघटनेच्यावतीने बुधवारी (दि. १५) लेखणी बंद आंदोलन करण्यात आले. या आंदोलनात १३२ कर्मचाऱ्यांनी सहभाग नोंदविला.

जिल्हा परिषद लेखा संवर्गातील कर्मचाऱ्यांना अन्य शासकीय कर्मचाऱ्यांच्या तुलनेत भेदभाव पूर्ण वागणूक मिळत असल्याने महाराष्ट्र शासन मुख्य सचिव यांना उच्च न्यायालयाच्या निर्देशनानुसार पदोन्नतीच्या टक्केवारीत वाढ करणे, लेखा संवर्गानुसार ग्रेड वेतन मिळणे, महाराष्ट्र वित्त व लेखा सेवा वर्ग-३ ची परीक्षा दरवर्षी नियमित घेणे, जिल्हा परिषद अंतर्गत लेखा कर्मचाऱ्यांचे जॉब चार्ट तयार करणे, पंचायत समिती स्तरावर लेखा अधिकारी वर्ग-२ चे पद निर्माण करणे यासह प्रलंबित मागण्यासाठी जि. प. लेखा कर्मचारी संघटनेच्या वतीने सुरवातीला काळी फीत लावून कामकाज करण्यात आले. आंदोलनाचा पुढचा टप्पा म्हणून लेखणी बंद आंदोलन करण्यात आले. तसेच मागण्या मान्य न झाल्यास आमरण उपोषणाचा इशारा संघटनेच्यावतीने देण्यात आला आहे.