VIDEO : हौस फिटली! टक्कर बघायला अख्खं गाव जमलं; अचानक रेडा उधळला, अनेकजण जखमी

जालना : जालना शहराजवळील एका गावात शनिवारी विनापरवाना रेड्यांची टक्कर लावण्यात आली होती. ही टक्कर बघण्यासाठी आसपासच्या गावांतील नागरिकांनी मोठी गर्दी केली. मात्र टक्कर सुरू असतानाच गर्दीला पाहून एक रेडा सैरावैरा धावत सुटला. प्रतिस्पर्धी रेड्याचा पाठलाग करण्यासाठी उधळलेल्या एका रेड्याने मग गर्दीत अनेकांना धडक देत जखमी केले आणि स्वतः देखील घसरून पडला.

रेड्यांची टक्कर लावण्यास बंदी असतानाही जालना शहरातील एका व्यक्तीने आपल्या वाढदिवसानिमित्त शहरापासून जवळच असलेल्या एका गावात शनिवारी या रेड्यांच्या टक्करीचे आयोजन केले होते. यावेळी उधळलेल्या रेड्याच्या भीतीने कित्येकांनी जीव मुठीत धरत पळ काढला. काही बघ्यांनी या साऱ्या धामधुमीचं चित्रीकरणही केलं. हाच व्हिडिओ आता समाजमाध्यमात चांगलाच व्हायरल झाला आहे.



देशमुखांना ज्याची भीती होती तेच घडलं... रितेश जिनिलियाला मोठा धक्का!

उत्साही कार्यकर्त्याच्या वाढदिवसाच्या निमित्ताने ठेवलेल्या या टक्करींवेळी उधळलेल्या रेड्याने मात्र बऱ्याच जणांना लोळवून बघ्यांना वाढदिवसाची चांगलीच अनोखी भेट दिल्याची चर्चा जोरात सुरू आहे.

दरम्यान, जालना शहराच्या चंदनझिरा पोलीस स्टेशनच्या हद्दीत या रेड्याच्या टक्करी झाल्या. मात्र पोलिसांनाही या घटनेचा थांगपत्ता नसल्याने आश्चर्य व्यक्त केले जात आहे.