समर्थ रामदासांच्या मूर्ती चोरी प्रकरणाचा छडा लागला; कर्नाटकात सापडले आरोपी, हनुमानाची मूर्तीही जप्त

जालना : अति प्राचीन समर्थांच्या मूर्ती चोरी प्रकरणात अतिशय वेगवान घडामोडी समोर आल्या आहेत. तब्बल दोन महिन्यानंतर कर्नाटक राज्यातून दोघांना जालना स्थानिक गुन्हे शाखेने ताब्यात घेतलं असून मुर्त्यादेखील हाती लागल्याची माहिती प्राप्त होत आहे. जालना LCB चे पथक सदरील प्रकरणातील आरोपींना सोबत घेऊन निघाले असून हे पथक जालना इथे आल्यावरच प्रत्यक्ष काय तो खुलासा होईल.

या मूर्ती चोरीचा अद्याप तपास लागलेला नव्हता. त्यामुळे गावकरी तसेच समर्थांच्या वंशजांसह भक्तांच्या भावना तीव्र झालेल्या होत्या. गावकरी व भक्तगणांनी काही दिवसांचा अल्टिमेटमदेखील दिला होता. जालना जिल्ह्यातील जाम समर्थ येथील या मुर्त्या चोरीला गेल्यानंतर या घटनेचे प्रतिसाद देशाबाहेरही उलटले होते. परदेशात असलेल्या भक्तांनी देखील आपल्या तीव्र प्रतिक्रिया व्यक्त करत संताप व्यक्त केला होता.

इंस्टाग्रामवर चक्क खऱ्या पिस्तूल विक्रीची जाहिरात, किंमत ७० हजार; पण पुढे जे झालं ते वाचून हादराल...
घनसावंगीचे आमदार राजेश टोपे यांनी विधानसभेत चौकशीची मागणी केली होती तर मुख्यमंत्री एकनाथ शिंदे यांनी फोन वरून बोलणं करत भक्तांना तपास लावण्याचे आश्वासन देत पोलीस यंत्रणेला सूचना दिल्या होत्या. परंतु सरी पोलीस यंत्रणा मागे लागूनही दोन महिने उलटले तरी चोर पोलीसांना गुंगारा देण्यात यशस्वी झाले होते. अशात आज सकाळी सकाळीच ही माहिती येऊन धडकताच पोलीस यंत्रणेसह सर्वांचाच जीव भांड्यात पडला आहे.

दरम्यान, LCB चे पथक दोन्ही महिलांना घेऊन आल्यानंतरच या पूर्ण चोरीचा तपास उलगडला जाणार आहे. तर या बातमीमुळे संपूर्ण गावात आनंदाचं वातावरण असून सगळ्यांना आता पोलिसांच्या येण्याची प्रतिक्षा आहे.