दोघा भावांची साथ कायमची सुटली; दुकानाकडे जाताना भीषण अपघातात अजयचा मृत्यू, तर गणेश गंभीर जखमी

जालना : जिल्ह्याच्या परतूर तालुक्यातील आष्टी ते कुंभार पिंपळगाव रोडवर स्कुटीने रस्त्यावर उभ्या असलेल्या ट्रकच्या ट्रालीला मागून जोराची धडक दिल्याने भीषण अपघात घडला आहे. या अपघातात एका तरुणाचा जागीच मृत्यू झाला असून दुसरा गंभीर जखमी झाला आहे.

या अपघाताबाबतची अधिक माहिती अशी की, परतूर तालुक्यातील ढोणवाडी येथील सुरेश पाटील यांची दोन मुले गणेश सुरेश पाटील (वय २४ वर्ष) आणि अजय सुरेश पाटील (वय १८) यांचे परतूरपासून ८ ते १० किलोमीटर अंतरावर असलेल्या तालुक्यातील आष्टी येथे ‘पाटील कलेक्शन' या नावाने दुकान आहे. आपले मूळ गाव असलेल्या ढोणवाडी ते आष्टी या ८-१० किलोमीटर अंतरावर त्यांचे दररोज व्यवसायाच्या निमित्ताने येणे-जाणे सुरू होते. दोघं भाऊ सकाळी घरून निघायचे, दिवसभर दुकानात आपला व्यवसाय करायचे आणि संध्याकाळी पुन्हा ढोणगाव या आपल्या गावी घरी परतायचे.

शेतकऱ्यांचा मोर्चा मुंबईत धडकण्याची तयारी, पण त्याआधीच सरकारची सकारात्मक पावले, आज घोषणेची शक्यता

दोघांची व्यवसायात एकमेकांना चांगली साथ होती. नेहमीप्रमाणे काल गुरुवार दि. १६ रोजी सकाळी ८ च्या दरम्यान दोघे भाऊ ढोणवाडी आपल्या गावातून स्कुटीवर निघाले होते. मात्र कुंभार पिंपळगाव ते आष्टी दरम्यान राज्य महामार्गावर उभ्या असलेल्या ट्रॅक्टरच्या ट्रॉलीला या दोघांच्या स्कुटीची जोरदार धडक बसली. धडक इतकी जोरदार होती की झालेल्या अपघातात दोघेही गंभीर जखमी झाले.

अपघातानंतर रस्त्यावरून जाणाऱ्या प्रवाशांनी तत्काळ धावपळ करत दोघांना उचलले. कुणीतरी फोन करून पोलिसांना माहिती कळवली. अपघातग्रस्त स्कुटी बाजूला करून दोघा भावांना आष्टी येथील प्राथमिक आरोग्य केंद्रात उपचार केले. मात्र अजय आणि गणेश या दोघांच्या डोक्याला जबर मार लागला होता आणि त्यांची प्रकृती बिघडू लागल्याने दोघांना जालना येथील खाजगी रुग्णालयात हलवण्यात आले. तिथे त्यांच्यावर तातडीने उपचारही सुरू करण्यात आले. मात्र उपचारादरम्यान अजय पाटीलचा मृत्यू झाला आणि दोघा भावांची साथ सुटली ती कायमची. अगदी कमी वयात व्यवसाय सुरू केलेल्या या दोघा भावांपैकी अजयच्या अपघाती मृत्यूने परिसरात हळहळ व्यक्त केली जात आहे.