जलदूतचे शतक

मिरज : मिरजेहून लातूरला पाणी घेऊन जाणारी शंभरावी रेल्वे गुरुवारी रवाना झाली. या शंभर रेल्वेव्दारे तब्बल 23 कोटी 20 लाख लिटर पाणी लातूरला पाठविण्यात रेल्वे प्रशासन यशस्वी झाले आहे. टंचाईमुळे चार दिवस रेल्वे खंडित करावी लागल्याचा अपवाद वगळता दहा एप्रिलपासून तीन महिने मिरजेतून लातूरला पाणी पुरवठा सुरू आहे.
मिरजेहून लातूरला रेल्वेद्वारे पाणी देण्याचा निर्णय झाल्यानंतर राजस्थानातून पाण्याची रेल्वे मिरजेत दाखल झाली. ५० टँकरच्या मोठ्या रेल्वेत पाणी भरण्याची यंत्रणा उभी करेपर्यंत दहा टँकरच्या लहान रेल्वेतून लातूरला पाणी पाठविले गेले. १० एप्रिल ते १८ एप्रिलपर्यंत दहा टँकरच्या नऊ रेल्वेतून सुमारे ४५ लाख लिटर पाणी लातूरला पाठविण्यात आले. मोठ्या रेल्वेत पाणी भरण्याची सोय झाल्यानंतर १९ एप्रिलपासून लातूरला ५० टँकरच्या मोठ्या रेल्वेतून रोज २५ लाख लिटर पाणी पाठविण्यात आले.
मिरजेत कृष्णा नदीतील पाणी पातळी खालावल्याने चार दिवस ही रेल्वे रद्द करावी लागली. यानंतर पुन्हा रेल्वेच्या नियमित फेऱ्या सुरू झाल्या. २७ जुलैअखेर २५ लाख लिटर पाण्याच्या रेल्वेच्या ९० फेऱ्या व पाच लाख लिटर पाण्याच्या रेल्वेच्या नऊ फेऱ्या अशा एकूण ९९ फेऱ्या पूर्ण झाल्या आहेत. २८ जुलै रोली शंभरावी पाण्याची रेल्वे लातूरला रवाना झाली. रेल्वेच्या या शंभर फेऱ्यांद्वारे लातूरला २३.२० कोटी लिटर पाणी पाठविण्यात आले आहे.
गुरुवारी रेल्वे कृती समिती, रेल्वे प्रवासी संघ आदी संघटनांच्या पदाधिकाऱ्यायांसह रेल्वेच्या अधिकाऱ्यांच्या उपस्थितीत रेल्वे लातूरला रवाना करण्यात आली.

२५ लाख लिटर
५० टँकरच्या रेल्वेतून वाहून नेले जाणारे पाणी

९१
मोठ्या रेल्वेच्या फेऱ्या

९
पाच लाख लिटर क्षमतेच्या रेल्वेच्या फेऱ्या

२३.२० लाख लिटर
आजवर मिरजेहून लातूरला नेण्यात आलेले पाणी