अक्षयची शहिदांच्या कुटुंबीयांना दिवाळी भेट

मटा ऑनलाइन वृत्त । कोल्हापूर

'ऑन ड्युटी २४ तास' असलेले पोलीस कर्मचारी आणि बॉलिवूडचा संवेदनशील अभिनेता अक्षयकुमार यांनी यंदा १०३ शहिदांच्या कुटुंबीयांची दिवाळी प्रकाशमान केली. कोल्हापूर परीक्षेत्राचे पोलीस महानिरीक्षक विश्वास नांगरे-पाटील यांच्या संकल्पनेतून साकारलेल्या या अभिनव उपक्रमाने शहिदांच्या नातलगांना निराशेचा अंधार झटकून टाकण्याचं बळ दिलं.

भारतमातेचं रक्षण करत असताना ज्यांनी आपला पुत्र, पती किंवा पिता गमावला, अशा कोल्हापूर परीक्षेत्रातील शहिदांच्या कुटुंबीयांची यादी करण्याच्या सूचना विश्वास नांगरे-पाटील यांनी केल्या. त्यानुसार १०३ शहिदांच्या नावांची यादी तयार झाली. या सर्व शहिदांच्या घरांमध्ये या दिवाळीला मिठाई घेऊन जायचं त्यांनी ठरवलं. जेव्हा या उपक्रमाबद्दल अभिनेता अक्षयकुमारला कळलं, तेव्हा या कुटुंबांना मदत करण्यासाठी तोही पुढे सरसावला.

भारतीय लष्कराबद्दल अक्षयला प्रचंड आदर, अभिमान आहे. जवानांसाठी, शहिदांच्या कुटुंबीयांच्या मदतीसाठी तो नेहमीच धावून जातो. यावेळी त्यानं २५ हजार रुपयांचे १०३ चेक तयार केले आणि त्यासोबत एक सदिच्छा पत्र जोडलं. सर्व शहिदांच्या मुलांच्या शिक्षणासाठी आपण हा खारीचा वाटा उचलत असल्याचं सांगून त्यानं आपल्या मनाचा मोठेपणा पुन्हा एकदा सिद्ध केला आहे.

पोलिसांनी दिलेली मिठाई आणि त्यासोबत अक्षयकुमारकडून आलेला धनादेश पाहून शहिदांच्या कुटुंबीयांना अश्रू आवरता आले नाहीत.

अक्षय कुमारचं पत्र...