म. टा. प्रतिनिधी, कोल्हापूर
जयप्रभा स्टुडिओच्या भूखंड विभाजनाच्या नगररचना (टीपी) विभागाकडून आयुक्तांकडे आलेल्या प्रस्तावावरुन बुधवारी झालेल्या स्थायी समितीच्या बैठकीत रणकंदन माजले. 'जयप्रभा' ही शहराची अस्मिता असताना हेरिटेज कॉन्झरव्हेशन कमिटीने हित न पाहता चुकीच्या पद्धतीने मंजुरी दिली आहे. कमिटीने स्टुडिओ वाचवण्यासाठी कोणताही प्रयत्न केलेला नाही. टीपीनेही वटमुखत्यारांबरोबर पत्रव्यवहार केलेला नाही,' असा आरोप करण्यात आला. अध्यक्षस्थानी सभापती शारंगधर देशमुख होते.
भूपाल शेटे म्हणाले, 'स्टुडिओतील जागेचा विकास रामसिना कन्स्ट्रक्शनकडून सुरू आहे. भूखंड आरक्षित राहण्यासाठी वेगवेगळी आंदोलने झाली आहेत. महापालिकेच्या ताब्यात जागा राहण्यासाठी २१ कोटी द्यावे लागणार असल्याचा अभिप्राय टीपीने यापूर्वी दिला आहे. रक्कम देण्याऐवजी टीडीआर का देत नाही, त्यासाठी संबंधित वटमुखत्यार यांच्याशी चर्चा का केली नाही? यापूर्वीचे दोन ठराव विखंडीत केलेले असताना पुन्हा तिसरा ठराव करण्यात आला आहे. हेरिटेज कमिटीने शहराचे हित न पाहता जानेवारी २०१८ मध्ये चुकीच्या पद्धतीने प्रस्तावाला मंजुरी दिली आहे. स्टुडिओ वाचवण्यासाठी सामुदायिक प्रयत्नांची आवश्यकता आहे. त्यासाठी धोरणात्मक निर्णय होण्याची आवश्यकता असून प्रस्ताव महासभेसमोर चर्चेला आणा.'
'शहरवासियांच्या जिव्हाळ्याचा विषय असल्याने दीड वर्षापासून फाइल प्रलंबित राहिली आहे. कोर्टाच्या आदेशाप्रमाणे हा झोन हेरिटेज तीनमध्ये समाविष्ट केला आहे. त्याबाबतचा अद्याप निर्णय झालेला नाही. तिसऱ्या ठरावाप्रमाणे रक्कम देणे अथवा टीडीआर देणे याचा निर्णय घेण्यासाठी प्रस्ताव तयार केला आहे,' असे स्पष्टीकरण टीपीच्या अधिकाऱ्यांनी दिले.
सभापती देशमुख म्हणाले, 'पूरबाधीत क्षेत्रातील नागरिकांना घरफाळा व पाणी बिलामध्ये सवलत देण्यात येणार आहे. प्रांत कार्यालयांकडून नागरिकांची यादी प्राप्त झाली आहे. मात्र यादीचे ६० टक्के काम पूर्ण झाले आहे. ' संदीप कवाळे व नियाज खान यांनी अपुऱ्या पाणीपुरवठ्यावरुन पाणीपुरवठा विभागावर जोरदार ताशेरे ओढले. विजय सुर्यवंशी यांनी अपुऱ्या पाणीपुरवठ्यानंतर टँकरद्वारे देण्यात येणाऱ्या पाण्याचे बिल अधिकाऱ्यांच्या पगारातून वसूल करण्याची सूचना केली.
माधुरी लाड म्हणाल्या, ' खानविलकर पेट्रोल पंप ते महावीर कॉलेजपर्यंतच्या रस्त्याची खोदाई करण्यात आली. मात्र अद्याप डांबरीकरण झालेले नाही. पापाची तिकटी ते गंगावेशपर्यंतचा रस्ता दुरुस्ती लवकर व्हावी.'
'पॅचवर्कच्या कामाला शुक्रवारपासून सुरुवात होणार आहे. पाणीपुरवठा विभागाचे काम अपूर्ण असल्याने पापाची तिकटी ते गंगावेशपर्यंतच्या रस्त्याचे काम थांबले आहे,' असे पवडी विभागाच्यावतीने स्पष्ट करण्यात आले.
.......
पॉइंटर
या प्रश्नावर अधिकारी निरुत्तर
चायनामेड बल्ब
उड्डाण पुलाच्या भिंतीवर झाडे-झुडपे
स्पॉट बिलिंग पद्धत बंद
प्रजासत्ताक दिनी विद्यार्थ्यांना जिलेबी वाटप नाही
.......................
चौकट
प्लास्टिकची परस्पर विक्री
'हॉटेलमधून वेस्टेज गोळा करताना दिली जाणारी पावती बोगस आहे. महापालिकेचे बनावट पावतीबुक छापले असून त्याद्वारे शुल्क जमा केले जात आहे. तसेच हॉस्पिटलमधील वेस्टेज संकलन करणाऱ्या गाडीतून संगनमताने परस्पर प्लास्टिकची विक्री केली जात आहे,' असा गंभीर आरोप नियाज खान यांनी केली.