एटीएस पथकाकडूनफातलेची कसून चौकशी

म. टा. वृत्तसेवा, इचलकरंजी

ठाणे येथील एटीएस पथक बुधवारी तपासकामासाठी इचलकरंजीत दिवसभर ठाण मांडून होते. मुंबईतील बांधकाम व्यावसायिक सुरेश बिजलानी याच्या हत्येची सुपारी घेणारा व सध्या पोलिस कोठडीत असलेल्या स्वप्निल फातले याची यावेळी कसून चौकशी करण्यात आली.

चार दिवसांपूर्वी शहापूर येथील म्हसोबा मंदिर परिसरात संशयितरित्या फिरताना स्वप्निल फातले याला शहापूर पोलिसांनी ताब्यात घेतले होते. त्याच्या झडतीत त्याच्याकडे दहा हजाराच्या रोकडसह देशी बनावटीचे पिस्तुल, दोन मॅगझिन व आठ जिवंत काडतुसे मिळून आली होती. त्याच्याकडे केलेल्या चौकशीत मुंबई येथील बांधकाम व्यावसायिक बिजलानी याच्या खुनाची सुपारी आंतरराज्य पिस्तुल तस्कर मनिष नागोरी याने दिल्याचे फातले याने सांगितले होते. बिजलानी हा सुरेश लोहरीया नामक बांधकाम व्यावसायिकाच्या खून प्रकरणात सध्या ठाण्यातील कारागृहात आहे.

या प्रकरणाच्या तपासकामासाठी ठाण्यातील एटीएसच्या तीन अधिकाऱ्यांचे पथक इचलकरंजीत दाखल झाले असून दिवसभर ते ठाण मांडून होते. यापूर्वी बिजलानी याच्या हत्येसाठी इचलकरंजीतील शाहूनगर परिसरातून गेलेल्या दोघा युवकांना एटीएसच्या पथकाने आठ महिन्यापूर्वी मुंबईत जेरबंद केले होते. बिजलानी याच्या हत्येचा दोन वेळा प्रयत्न तसेच त्याची सुपारी शहरातील युवकांना देण्यात आल्याने या प्रकरणाची सखोल चौकशी केली जात आहे. दरम्यान, मुख्य संशयित मनिष नागोरी अद्याप फरारी असून शहापूर पोलिसांची पथके त्याचा शोध घेत आहेत.