अंबप परिसरातदोन गव्यांचा धुडगूस

हातकणंगले

अंबप (ता.हातकणंगले) येथील अंबप - तळसंदे रस्त्यावरील ओढ्याच्या काठावर असणाऱ्या स्मशानभूमीजवळील रघुनाथ महादेव माने यांच्या मालकीच्या शेतात रविवारी सायंकाळी दोन गव्यांनी अक्षरशः धुडगूस घातला. या परिसरात प्रथमच झालेल्या गव्याच्या दर्शनाने शेतकरी व सर्वसामान्य नागरिकांत घबराटीचे वातावरण पसरले आहे. अंबप - तळसंदे रस्त्यानजीक रघुनाथ माने यांच्या नागोबा मंदिर शिवार शेतात सायंकाळी गवा आल्याचे माने यांनी पाहिले. गव्यांनी उसाच्या मोठ्या फडात घुसून नुकसान केले. दरम्यान नागरिकांनी वडगाव पोलिस ठाण्यात ही माहिती देवून नरंदे वन विभागालाही कळवले. नरंदे वन क्षेत्रपाल विश्वजीत जाधव, वनपाल शशिकांत नकुले, वनरक्षक रसीद कादरी, वनसेवक भगवान भंडारी यांचे पथक रात्री अंबप येथे आले. उसाच्या शेतात रात्री उशीरापर्यंत गव्याचा शोध घेण्याचे काम सुरु होते.