फोटो
...............
' प्रवास वर्णनापलिकडील वस्तुनिष्ठ माहिती'
'अमेरिका आणि बरंच काही'चे प्रकाशन
म. टा. प्रतिनिधी, कोल्हापूर
'अमेरिका आणि बरंच काही' हे पुस्तक केवळ प्रवास वर्णन नाही तर त्या माध्यमातून अमेरिकेचे दर्शन घडते. त्या देशाची संपूर्ण माहिती पुस्तकातून उपलब्ध होत असल्याने स्पर्धा परीक्षेचा अभ्यास करणाऱ्या विद्यार्थ्यांसाठी ते उपयुक्त ठरेल,'असे प्रतिपादन शिवाजी विद्यापीठाचे उपकुलसचिव डॉ. व्ही. एन. शिंदे यांनी केले.
अजब हास्य शाळेचे सभासद प्रमोद दरवेशी लिखित 'अमेरिका आणि बरंच काही' या पुस्तकाचे प्रकाशन नुकतेच झाले. 'अक्षर दालन'चे रवींद्रनाथ जोशी कार्यक्रमाच्या अध्यक्षस्थानी होते. शाहू स्मारक भवन येथे हा कार्यक्रम झाला. दरवेशी यांनी यावेळी अमेरिकेतील वास्तव्यादरम्यानचे अनुभव कथन केले आहेत. अमेरिकेतील पर्यटनस्थळे, भौगोलिक, राजकीय, आर्थिक स्थिती यासंदर्भात वस्तुनिष्ठ माहिती पुस्तकात आहे. शिवाय अमेरिकन संस्कृती, परंपरा यातील बारकावेही नमूद केले आहेत, अशी मते मान्यवरांनी व्यक्त केली.
प्रमुख वक्ते म्हणून बोलताना प्रा. डॉ. डी.ए.देसाई यांनी पुस्तकाची वैशिष्ट्ये नमूद केली. लेखकाने पुस्तक लेखन करताना 'मी'पणा न आणता तटस्थपणे त्या देशाचे वर्णन केले आहे. स्थळ, वास्तूंचे हुबेहूब शब्दचित्रण, ओघवती भाषा यामुळे पुस्तक वाचकांच्या नक्कीच पसंतीस उतरेल, असे सांगितले. याप्रसंगी प्रा. डॉ. शिवाजीराव देशमुख, कवी अशोक भोईटे यांनी मनोगत व्यक्त केले.
................