दोन सिंगल फोटो
म. टा. प्रतिनिधी, कोल्हापूर
लक्षतीर्थ वसाहत येथील चाँद मस्जिदच्या ठिकाणी बंदोबस्तासाठी असलेले पोलिस नाईक पंडित रंगराव पोवार यांना शिवीगाळ, धक्काबुक्की करुन मारहाण केल्याप्रकरणी दोन तरुणांना लक्ष्मीपुरी पोलिसांनी शुक्रवारी अटक केली. त्यांच्यावर सरकारी कामात अडथळा आणल्याप्रकरणी गुन्हा दाखल केला आहे. विनायक बाबूराव गस्ते ( वय ३२, रा. पहिला बस स्टॉप, लक्षतीर्थ वसाहत), शुभम अशोक सूर्यवंशी (वय २८, रा. रंकाळा टॉवर, धुण्याची चावी) अशी दोघांची नावे आहेत.
लक्ष्मीपुरी पोलिसांनी दिलेल्या माहितीनुसार, पंडित पोवार हे पोलिस मुख्यालयात पोलिस नाईक म्हणून कार्यरत आहेत. करोनाच्या पार्श्वभूमीवर त्यांची नेमणूक लक्षतीर्थ वसाहत येथील मस्जिदजवळ केली आहे. गुरुवारी रात्री ते बंदोबस्तावर असताना या परिसरात चार ते पाच तरुण दंगा करत असल्याचे त्यांच्या निदर्शनास आले. त्यांनी या सर्वांना समजावून सांगण्याचा प्रयत्न केला. मात्र ते पाच जण ऐकण्याच्या मनस्थितीत नव्हते. पंडित पोवार यांनी त्याला हटकण्यास सुरुवात केली असता त्यांच्या अंगावर धावून धक्काबुक्की केली. शिवीगाळ करुन गस्ते आणि सूर्यंवंशी या दोघांनी त्यांना मारहाण केली. त्या वेळी मोठा तणाव निर्माण झाला. परिसरातील रहिवाशी जमा झाल्यानंतर त्या दोघांनी पळ काढला. येथील रहिवाशांनी त्यांच्यावर कारवाई करण्याची मागणी केली. लक्ष्मीपुरी पोलिसांनी शुक्रवारी सकाळी या दोघांचा शोध घेऊन त्यांना अटक केली.
...