म.टा.प्रतिनिधी, कोल्हापूर
करवीर तालुक्यातील सुनील प्रकाश बेलेकर (वय ३७) या ब्रेन डेड झालेल्या तरुणाच्या कुटुंबीयांनी घेतलेल्या अवयवदानाच्या निर्णयामुळे 'कॅडेव्हरीक' मुत्रपिंड प्रत्यारोपण शस्त्रक्रियेद्वारे तिघांना जीवनदान देण्यात आले. येथील अॅपल सरस्वती हॉस्पिटलमध्ये अवयवदान शस्त्रक्रिया पार पडली.
एसटी कंडक्टर असलेल्या बेलेकर यांच्या मेंदूमध्ये रक्तस्त्राव झाल्याने त्यांना रुग्णालयात भरती करण्यात आले होते. त्यांचा ब्रेन डेड झाल्याने डॉक्टरांनी बेले कुटुंबियांना अवयवदान करण्याचा सल्ला दिला. त्यानुसार कमिटीच्या निर्णयानुसार यकृत व दोन मूत्रपिंड दान करण्यात आले. एका मूत्रपिंडाचे अॅपल सरस्वती हॉस्पिटलमध्ये प्रत्यारोपण करण्यात आले तर एक यकृत व दुसरे मूत्रपिंड बाहेर पाठवण्यात आले.
या मोहिमेत डॉ. अशोक भुपाळी, डॉ. प्रकाश शारबिद्रे, डॉ. राजीव कोरे, डॉ. राहुल दिवाण, डॉ. अमृत नेर्लीकर, डॉ. सुनील शेणवी, डॉ. गिरीश हिरेगौडर, डॉ. श्रेया हनमशेट्टी, डॉ. सागर कुरुणकर, डॉ. शीतल देसाई, डॉ. वैभव चव्हाण यांनी सहभाग घेतला. तसेच ग्रीन कॉरीडोरसाठी शहर वाहतूक पोलिस निरीक्षक अनिल गुजर व शहर पोलिसांचे सहकार्य लाभले.