हरिओमनगरमध्ये घरफोडी
म. टा. प्रतिनिधी, कोल्हापूर
रंकाळा तलवाच्या पिछाडीस असलेल्या हरिओम नगरमध्ये बंद घराचा कडी-कोयंडा तोडून अज्ञात चोरट्याने सोन्या-चांदीचे दागिने व रोख रक्कम असा ६० हजारांचा मुद्देमाल लंपास केला. मंगळवारी (ता. १२) दुपारी हा प्रकार उघडकीस आला. प्रकाश कृष्णाजी म्हेतर (वय ६८) यांनी जुना राजवाडा पोलिस ठाण्यात अज्ञात चोरट्याच्या विरोधात फिर्याद दिली.
पोलिसांनी दिलेल्या माहितीनुसार, प्रकाश म्हेतर यांचा मुलगा व सून हे दोघे एका राष्ट्रीयकृत बँकेत काम करतात. वर्षापूर्वी त्यांची बदली अकोला येथे झाली आहे. सुटीसाठी ते कोल्हापुरात आले आहेत. शुक्रवार पेठेत म्हेतर यांचे जुने घर आहे. रविवारी सायंकाळी म्हेतर व त्यांच्या पत्नी शुक्रवार पेठेतील घरी गेले होते. मंगळवारी ते पुन्हा हरिओम नगरमधील घराकडे गेले असता, घराचा कडी-कोयंडा उचकटल्याचे लक्षात आले. चोरट्यांनी बेडरुममधील कपाटातील कपडे व इतर साहित्य विस्कटून टाकले होते. तसेच त्यामध्ये असणाऱ्या लहान मुलांच्या सोन्याच्या ५ अंगठ्या, चांदीच्या वस्तू , महागडी चार घड्याळे व तीन हजार रुपये रोख रक्कम असा ६० हजारांचा मुद्देमाल चोरट्याने लंपास केल्याचे म्हेतर यांचा निदर्शनास आले. त्यांनी तत्काळ जुना राजवाडा पोलिसांना याची माहिती दिली. पोलिसांनी घटनास्थळी धाव घेऊन पाहणी केली.