एमएचटी-सीईटी
प्रवेश परीक्षा आज
म. टा. प्रतिनिधी,कोल्हापूर
महाराष्ट्र सरकारमार्फत सामायिक प्रवेश परीक्षा गुरुवारी १० मे रोजी कोल्हापूर शहरामध्ये आयोजित करण्यात आली आहे. ही परीक्षा शहरातील ५३ केंद्रावर होत असून या परीक्षेसाठी सतरा हजारांवर उमेदवार बसणार असल्याची माहिती निवासी उपजिल्हाधिकारी संजय शिंदे यांनी दिली.
राज्य सरकारने अधिसूचित केल्यानुसार महाराष्ट्र राज्यात यावर्षी अभियांत्रिकी व तंत्रज्ञान, औषधनिर्माणशास्त्र (फार्मसी), डी. फार्म., कृषी विज्ञान, कृषी अभियांत्रिकी व तंत्रज्ञान या पदवी अभ्यासक्रमाच्या प्रवेशासाठी एमएचटी-सीईटी २०१८ ही सामायिक प्रवेश परीक्षा अनिवार्य करण्यात आलेली आहे. या परीक्षेतील गुणांच्या आधारे वरील सर्व अभ्यासक्रमाचे प्रवेश केंद्रीभूत प्रक्रियेच्या माध्यमातून करण्यात येणार आहे. या परीक्षेसाठी विद्यार्थ्यांनी परीक्षेचे प्रवेश पत्र (Admit Card) व स्वत:च्या ओळखीसाठी प्रवेश पत्रामध्ये नमूद केलेल्यापैकी कोणतेही एक ओळखपत्र मूळप्रतीसह सोबत आणणे आवश्यक आहे.
तसेच विद्यार्थ्यांनी परीक्षेचा पेपर लिहिण्यासाठी फक्त काळया शाईचे बॉल पेन, पाण्याची बाटली, लिखाणाचा पुठ्ठा (रायटींग पॅड) इतकेच साहित्य परीक्षाकेंद्रावर आणण्यास परवानगी आहे. या व्यतिरिक्त मोबाइल, कॅलक्यूलेटर, लॉगटेबल, इलेक्ट्रॉनिक गॅझेट इत्यादी साहित्य परीक्षाकेंद्रामध्ये आणण्यास परवानगी नाही. प्रवेशपत्रामध्ये दिलेल्या वेळेनंतर परीक्षा केंद्रावर उशिरा येणाऱ्या विद्यार्थ्यांना परीक्षेला बसण्याची परवानगी देण्यात येणार नाही. तसेच या परीक्षेमध्ये गैरव्यवहार व गैरप्रकार करणाऱ्या उमेदवारांवर कायदेशीर कार्यवाईस पात्र ठरेल. प्रत्येक परीक्षा केंद्रावर पोलिस बंदोबस्त ठेवण्यात आला असून परीक्षेवर नियंत्रण ठेवण्यासाठी सरकारमार्फत विविध भरारी पथके तयार करण्यात आली आहेत. तसेच ग्रामीण भागातून विद्यार्थ्यांसोबत येणाऱ्या पालकांसाठी बैठकीची व विश्रांतीची व्यवस्था करण्यात आलेली आहे.