म. टा. प्रतिनिधी, कोल्हापूर
रुग्णवाहिकेचा लाईट अंगावर पाडल्याच्या रागातून चौघांनी केलेल्या मारहाणीत दोघे जखमी झाले. यातील महेश आनंदराव पाटील (वय ३५) यांना चाकूचे घाव वर्मी लागले, तर गणेश आनंदराव पाटील (३३, दोघेही रा. जवाहरनगर, कोल्हापूर) हे जखमी झाले. रविवारी (ता. १५) मध्यरात्री राजारामपुरीतील ११ व्या गल्लीत हा प्रकार घडला. याबाबत सनी देशपांडे, शुभम उर्फ प्रज्ज्वल देवगीरकर उर्फ जोकर, नितीन आयरे, नितीन गडियार उर्फ बॉब (सर्व रा. जवाहरनगर) यांच्यावर गुन्हा दाखल केला आहे. दरम्यान, पोलिसांनी दोन संशयितांना ताब्यात घेतले.
राजारामपुरी पोलिसांनी दिलेल्या माहितीनुसार, जवाहरनगर येथील गणेश पाटील यांची रुग्णवाहिका आहे. रविवारी मध्यरात्री ते रुग्णवाहिका घेऊन घरी निघाले होते. यावेळी राजारामपुरीच्या ११ व्या गल्लीत चार तरुणांनी रुग्णवाहिका अडवली. 'आमच्यावर लाईट का पाडलास,' अशी विचारणा करीत त्यांनी पाटील यांना दमदाटी केली. यातील दोघांनी गणेश यांना रुग्णवाहिकेतून बाहेर ओढून लाथाबुक्क्यांनी मारहाण केली. यानंतर गणेश हे मोठा भाऊ महेश पाटील यांच्यासह कारमधून राजारामपुरी पोलिस ठाण्यात तक्रार देण्यासाठी निघाले होते. यावेळी सनी देशपांडे याच्यासह चौघांनी कोंडुसकर पेट्रोल पंपासमोर महेश यांची कार अडवली. 'आमच्याविरोधात पोलिसात तक्रार देतोस काय?' असे म्हणत महेश आणि गणेश यांना धक्काबुक्की केली. महेश हे कोंडुसकर पेट्रोल पंपाच्या दिशेने पळाले. यावेळी हल्लेखोरांनी पाठलाग करून महेश यांच्या डोक्यात आणि पाठीवर चाकूने वार केले. गंभीर जखमी अवस्थेतील महेश यांनी खासगी रुग्णालयात उपचार घेतले. यानंतर त्यांनी राजारामपुरी पोलिस ठाण्यात फिर्याद दाखल केली. दरम्यान, पोलिसांनी दोन संशयितांना ताब्यात घेतले असून त्यांच्याकडे चौकशी सुरू आहे. सर्व हल्लेखोरांना तातडीने पकडून त्यांना कोर्टात हजर केले जाईल, अशी माहिती पोलिस निरीक्षक औदुंबर पाटील यांनी दिली.
चौकट
हल्लेखोर दारुच्या नशेत
हल्लेखोरांनी मद्यप्राशन केले होते. ११ व्या गल्लीत रस्त्याकडेला थांबल्यावरही ते मद्यप्राशन करीत होते. यावेळी रुग्णवाहिकेचा प्रकाश पडल्याने ते चिडले. चालकाने मुद्दाम अंगावर प्रकाश पाडला, असे समजून त्यांनी रुग्णावाहिका चालकाला मारहाण केली. हल्लेखोर पोलिसांच्या रेकॉर्डवरील सराईत आहेत, अशी माहिती पोलिसांनी दिली.