मराठा मोर्चाला सामोरा जाणार नाही!: पाटील

मटा ऑनलाइन वृत्त । कोल्हापूर

कोल्हापूर येथील मराठा क्रांती (मूक) मोर्चाला सामोरे जाऊन मोर्चेकऱ्यांचं निवेदन स्वीकारण्याच्या स्वत:च्या घोषणेवर महसूलमंत्री चंद्रकांत पाटील यांनी माघार घेतली आहे. मोर्चेकऱ्यांच्या विरोधानंतर पाटील यांनी हा निर्णय घेतला आहे.

येत्या १५ ऑक्टोबर रोजी कोल्हापूर शहरात मराठा मोर्चा निघणार आहे. या मोर्चाला सामोरं जाऊन मोर्चेकऱ्यांच्या मागण्यांचं निवेदन स्वीकारणार असल्याचं पाटील यांनी जाहीर केलं होतं. मोर्चेकऱ्यांशी सरकारचा संवाद सुरू व्हावा, अशी यामागची भूमिका होती. मात्र, मोर्चाच्या कोअर कमिटीच्या बैठकीत पाटील यांच्या या निर्णयाला विरोध झाला. मागण्याचं निवेदन फक्त जिल्हाधिकाऱ्यांनाच दिलं जाईल, असं कमिटीनं स्पष्ट केलं. त्या पार्श्वभूमीवर एका वृत्तवाहिनीशी बोलताना पाटील यांनी आज आपली बाजू मांडली. 'कोअर कमिटीचा निर्णय मला मान्य आहे. मोर्चाचं नेतृत्व करणाऱ्या तरुणींनी मागण्यांचं निवेदन जिल्हाधिकाऱ्यांना द्यावं,' असं ते म्हणाले. मोर्चात सहभागी होणार का, या प्रश्नाचं उत्तर देण्याचं मात्र त्यांनी टाळलं.