म. टा. प्रतिनिधी, कोल्हापूर
विधानसभा निवडणूकीच्या वादातून स्वत:च्या मोबाइलवर अश्लिल व्यंगचित्रांचे स्टेटस ठेवून गावात तेढ निर्माण करण्याचा प्रयत्न केल्याप्रकरणी चिंचवडे तर्फ कळे (ता. करवीर) येथील सरपंच, संशयित युवराज बाबूराव कांबळे (वय ४०) याला करवीर पोलिसांनी शुक्रवारी रात्री अटक केली. गावात जातीय सलोखा बिघडविण्याचा प्रयत्न करणाऱ्या कांबळे यांना हद्दपार करावे या मागणीचे निवेदन ग्रामस्थांनी दिल्याने त्यांच्याविरोधात पोलिस अधीक्षक व करवीर प्रातांधिकाऱ्यांना तत्काळ प्रस्ताव पाठविण्यात आला आहे असे सूत्रांनी सांगितले.
करवीरचे पोलिस निरीक्षक सुनील पाटील यांनी दिलेल्या माहितीनुसार, निवडणुकीच्या निकालानंतर संशयित युवराज कांबळे यांचा विजयी उमेदवारांचे समर्थक बाजीराव शंकर कांबळे यांच्याशी वाद झाला. त्यानंतर संशयित सरपंच युवराज कांबळे याने स्वत:च्या मोबाइलवर अश्लील व्यंगचित्रांचे स्टेटस ठेवून गावात तेढ निर्माण करण्याचा प्रयत्न केला. त्याने महिलांचा विनयभंग होईल, याप्रकारे स्टेटस ठेवले होते. त्यामुळे चिंचवडे तर्फ कळे येथील ग्रामस्थांच्यात संतापाची लाट उसळली. ग्रामस्थांनी संशयित युवराजच्या विरोधात कारवाई करण्याची मागणी केली. त्यानुसार सरदार शामराव पाटील यांनी फिर्याद दिली. त्यानंतर करवीर पोलिसांनी ग्रामस्थांची समजूत काढत संशयिताला अटक केली. संशयित कांबळेला गावातून हद्दपार करा, अशी मागणी लावून धरल्याने पोलिसांनी वरीष्ठांकडे त्याच्याविरोधात प्रस्ताव तातडीने सादर केला.